Y Gwyll yn dychwelyd ar Ddydd Calan

Y Gwyll Image copyright S4C

Bydd drama dditectif Y Gwyll/Hinterland yn dychwelyd gyda phennod arbennig gydag is-deitlau Saesneg ar S4C ar 1 Ionawr.

Bu cyfres gyntaf Y Gwyll/Hinterland, oedd yn dilyn DCI Tom Mathias (Richard Harrington) a'i dîm wrth iddyn nhw ymchwilio i droseddau tywyll yn Aberystwyth, yn hynod boblogaidd gyda gwylwyr wrth iddi gael ei darlledu ar S4C, BBC Cymru Wales a BBC Four.

'Cael ei wthio at y dibyn'

Yn niweddglo'r gyfres gwelsom DCI Tom Mathias - cyn dditectif gyda Heddlu'r Met yn Llundain sy'n byw o ddydd i ddydd dan gysgod tywyll ei orffennol - yn cael ei wthio at y dibyn.

Mae'r cynhyrchwyr Fiction Factory wedi cyhoeddi y bydd Richard Harrington yn dychwelyd fel Mathias yn y bennod newydd, ond ble mae e wedi bod, a sut mae pethau wedi newid ers iddo fynd?

'Misoedd ar fisoedd o waith caled'

"Rydym yn falch o gyhoeddi bod y cast a'r criw yn ôl yn ffilmio yng Ngheredigion ar gyfer y rhaglen arbennig fydd ymlaen ddydd Calan," meddai Gwawr Martha Lloyd, Comisiynydd Drama S4C.

"Daw hyn ar ôl misoedd ar fisoedd o weithio'n galed i ddatblygu straeon gafaelgar a dyrys ar gyfer y penodau nesaf. Gall y gwylwyr edrych ymlaen at ragor o straeon cyffrous fydd yn gwneud iddyn nhw guddio tu ôl i'w clustogau, a hefyd i ddod i wybod mwy am ein prif gymeriadau a'u gorffennol dirgel."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.