Canolfan celfyddydau'r Muni ym Mhontypridd wedi cau

Canolfan Muni
Image caption Dywedodd y cyngor bod angen cau'r Muni er mwyn arbed arian

Mae canolfan gelfyddydau y Muni ym Mhontypridd wedi cau ar ôl i gynhyrchiad gan Frank Vickery gael ei dangos nos Sadwrn.

Mae'r ganolfan wedi bod ar agor ers y 1980au, ond ym mis Mai dywedodd Cyngor Rhondda Cynon Taf y byddai'n cau fel rhan o doriadau werth £70m dros bedair blynedd.

Ar y pryd, dywedodd yr awdurdod "does dim datrysiad hawdd yn y sefyllfa ariannol anodd yma".

Dywedodd Mr Vickery bod y penderfyniad i gau'r ganolfan yn un "ofnadwy", a siaradodd gyda'r gynulleidfa wrth i'r cynhyrchiad olaf ddod i ben.

Ychwanegodd ei fod yn deall bod gan ddau gwmni ddiddordeb mewn cymryd rheolaeth am y Muni, ond na fyddai'n ail-agor fel canolfan gelfyddydau.

"Dwi wedi bod yn llwyfannu cynyrchiadau yna ers 21 o flynyddoedd - ac wedi cynnal cyfanswm o 44 yna," meddai.

Dywedodd nad oedd yn ganolfan perfformiad yn unig, ond yn un oedd yn cael ei ddefnyddio gan y gymuned gyfan ym Mhontypridd.

Straeon perthnasol