Tywydd stormus dros nos yn creu trafferthion

Storm dros Fae Abertawe Image copyright Lisa Medcalf
Image caption Mae cartrefi yn y gorllewin a'r gogledd heb drydan wedi stormydd trydanol

Mae`r Swyddfa Dywydd wedi rhybuddio y gallai gwyntoedd cryfion o hyd at 60 mya daro Cymru ddydd iau ond mae'n anhebygol y bydd hi mor stormus â nos Fercher.

Mae 16 o ardaloedd ar draws siroedd Abertawe, Caerfyrddin, Penfro, a Cheredigion heb drydan ar hyn o bryd wedi tywydd garw dros nos, gyda 1600 o gartrefi a busnesau heb drydan rhwng Gorseinon a Thregwyr yn unig.

Mae Scottish Power yn dweud bod cannoedd o'u cwsmeriaid ar draws y gogledd hefyd wedi colli trydan, y rhan fwya yn ardal Caernarfon. Mae peirianwyr yn ceisio adfer y cyflenwad.

Stormydd trydan sydd wedi achosi y rhan fwya o`r problemau.

Image copyright Matthew Horwood
Image caption Y storm ym Mhorthcawl

Trafferthion teithio

Mae un lôn ynghau oherwydd gwyntoedd cryfion ar yr M48 Pont Hafren i`r ddau gyfeiriad.

Yn y cyfamser, mae gwyntoedd cryfion ar Bont Britannia wedi arwain at gyfyngiadau gyrru o 30 mya.

Mae gwasanaeth bws wedi bod yn rhedeg rhwng Abergwaun a Chaerfyrddin wedi problemau ar y signalau.

Roedd mellt wedi taro signalau ac wedi achosi hyd at 30 munud o oedi rhwng Cyffordd Llandudno a Chaergybi.