Carchar am ladd dyn oedd wedi ceisio atal trais

Jason Grovell Image copyright Wales News Service
Image caption Honodd Grovell nad oedd yn cofio ymosod ar Mr Sweeney

Mae llys wedi clywed bod dyn wedi cael ei ladd ar ôl cael ei ddyrnu yn ei ben mewn tafarn.

Roedd Jake Sweeney, 26, wedi ymyrryd i geisio stopio pobl rhag ymladd, pan gafodd ei daro ei hun.

Fe syrthiodd i'r llawr gan dorri ei benglog.

Cafodd Jason Grovell, 24 o Gaerffili ei garcharu am bedair blynedd ar ôl pledio'n euog i ddynladdiad.

Clywodd y llys fod Grovell, tad i un, wedi bod yn yfed ac wedi cymryd cocên.

Dechreuodd yr ymladd tu allan i dafarn yr Irish Tymes a cheisiodd Mr Sweeney ymyrryd.

Cafodd ei daro yn ei ben a bu farw pedwar diwrnod yn ddiweddarach.

Image copyright Gwent Police
Image caption Bu farw Jake Sweeney yn yr ysbyty

Mewn datganiad dywedodd ei dad Mark Sweeney: "Rwyf wedi torri fy nghalon, byddaf yn colli Jake am weddill fy mywyd. Ni fydd bywyd fyth yr un fath."

Dywedodd y barnwr Eleri Rees wrth Grovell: "Roedd hwn yn weithred lwfr. Ni wnaeth Mr Sweeney weld y dwrn yn cael ei daflu ac felly ni chafodd gyfle i amddiffyn ei hun."