Wyth newid i dîm Cymru yn erbyn Fiji

Gethin Jenkins Image copyright Huw Evans picture agency

Mae Warren Gatland wedi cyhoeddi'r tîm fydd yn wynebu Fiji yn yr ail gêm yng nghyfres yr hydref yng Nghaerdydd ddydd Sadwrn.

Mae wyth newid i'r tîm a gollodd yn erbyn Awstralia y Sadwrn diwethaf a'r unig syndod mawr efallai yw nad yw Sam Warburton yn y garfan o gwbl.

Gethin Jenkins sy'n dychwelyd i'r rheng flaen, ac ef hefyd fydd y capten.

Un arall sydd ddim yn y 23 yw Jonathan Davies, er i'r hyfforddwr cynorthwyol Rob Howley awgrymu ddydd llun ei fod e wedi gwella o anaf.

Mae Scott Williams yn dychwelyd i'r canol gyda George North yn symud yn ôl i'r asgell, a Mike Phillips fydd yn dechrau yn safle'r mewnwr gyda Rhys Webb hefyd yn absennol.

Samson Lee yw'r unig un o'r rheng flaen i gadw'i le o'r Sadwrn diwethaf, ac mae ail reng newydd o Bradley Davies a Luke Charteris gyda Justin Tipuric yn disodli Warburton o'r rheng ôl.

Dywedodd Warren Gatland: "Mae nifer o newidiadau, ond rydym yn credu bod hwn yn dîm cryf i herio Fiji.

"Roeddem yn hapus gyda pherfformiad yr wythnos ddiwethaf, a'r gobaith yw adeiladu ar hynny gyda buddugoliaeth y penwythnos yma.

"Mae anafiadau wedi ein gorfodi i wneud ambell newid, ond dydyn ni ddim yn credu bod hynny'n gwanhau'r tîm"

Cymru v.Fiji: Stadiwm y Mileniwm, Dydd Sadwrn, 15 Tachwedd :-

Olwyr: Liam Williams (Scarlets), Alex Cuthbert (Gleision), Scott Williams (Scarlets), Jamie Roberts (Racing Metro), George North (Northampton Saints), Rhys Priestland (Scarlets), Mike Phillips (Racing Metro);

Blaenwyr: Gethin Jenkins (Gleision, CAPT), Scott Baldwin (Gweilch), Samson Lee (Scarlets), Bradley Davies (Wasps), Luke Charteris (Racing Metro), Dan Lydiate (Heb glwb), Justin Tipuric (Gweilch), Taulupe Faletau (Dreigiau).

Eilyddion: Emyr Phillips (Scarlets), Nicky Smith (Gweilch), Rhodri Jones (Scarlets), Alun Wyn Jones (Gweilch), James King (Gweilch), Rhodri Williams (Scarlets), James Hook (Caerloyw), Cory Allen (Gleision).

Straeon perthnasol