Llafur Cwm Cynon yn trafod dyfodol Ann Clwyd

Ann Clwyd Image copyright (C) British Broadcasting Corporation
Image caption Mae Ann Clwyd wedi treulio 30 mlynedd yn cynrychioli Cwm Cynon yn San Steffan

Disgwylir i'r Aelod Seneddol Ann Clwyd glywed heddiw ai hi fydd yr ymgeisydd Llafur yng Nghwm Cynon pan ddaw'r etholiad cyffredinol nesaf.

Ym mis Chwefror fe ddywedodd Ms Clwyd y byddai yn rhoi'r gorau i'w gwaith fel Aelod Seneddol, ond fe newidiodd ei meddwl ym mis Medi ar ôl i'r blaid orchymyn y dylid dewis yr ymgeisydd nesaf o blith rhestr o ferched yn unig.

Roedd anfodlonrwydd mawr ymhlith rhai yn yr etholaeth ynglŷn â'r gorchymyn ynglŷn â sut i ddewis ei holynydd - ac yn ôl Ms Clwyd fe ofynnwyd iddi ail ystyried ei phenderfyniad i ymddeol.

Yr ymgeiswyr eraill ar gyfer y rôl yw Katie Antippas, swyddog undeb PCS; y cynghorydd sir lleol Sue Pickering; a'r gwyddonydd Aysha Raza, cynghorydd Llafur yn Llundain, sydd yn hanu yn wreiddiol o Aberdâr.

Mae Ann Clwyd wedi cynrychioli'r etholaeth yn Nhŷ'r Cyffredin ers iddi ennill is-etholiad yno yn 1984.