Arian loteri yn hwb i brosiect llys Tywysog Llywelyn

Argraff artist o lys Llywelyn Image copyright Arall
Image caption Argraff artist o lys Llywelyn

Mae Amgueddfa Cymru wedi derbyn £175,000 drwy'r Loteri Cod Post.

Dywedodd llefarydd ar ran yr Amgueddfa Werin y byddai cyfran o'r arian "yn helpu talu am ddau saer maen fydd yn gweithio ar ail-greu Llys Rhosyr, llys y Tywysog Llywelyn, oedd yn wreiddiol ger Niwbwrch ar Ynys Môn".

Hwn oedd un o lysoedd brenhinol Llywelyn Fawr (1173-1240) tywysog Gwynedd yn y drydedd ganrif ar ddeg.

Fe gafodd ei olynu gan ei fab Dafydd ap Llywelyn.

Mae'r amgueddfa wedi dweud y bydd ail-greu'r llys yn un o'r prosiectau archeolegol mwyaf heriol yng Nghymru.

Pan fydd wedi ei orffen bydd plant ysgol a grwpiau yn gallu aros dros nos yno.

Cafodd Llys Rhosyr ei ddarganfod gan yr archeolegwr Neil Johnstone yn 1992 ger eglwys Niwbwrch.

Image copyright Arall
Image caption Y safle yn yr Amgueddfa Werin: lluniau drwy garedigrwydd Beth Thomas