Americanwr yn cipio gwobr Artes Mundi

Theaster Gates Image copyright Artes Mundi/Theaster Gates
Image caption Theaster Gates gyda rhan o'r gwaith buddugol 'Freemason's Bucking Goat'

Yr artist Theaster Gates o Chicago sydd wedi ennill gwobr fawreddog Artes Mundi yng Nghaerdydd.

Mr Gates ddaeth i'r brig o'r deg gafodd eu henwebu ar gyfer y wobr o £40,000 - y wobr ariannol fwyaf i'r celfyddydau yn y DU.

Daeth y rhestr fer o dros 800 o geisiadau gan artistiaid o 70 o wledydd gan gynnwys Portiwgal, Israel a Gwlad yr Iâ.

Y Prif Weinidog Carwyn Jones a gyflwynodd y wobr i Mr Gates yn yr Amgueddfa Genedlaethol yng Nghaerdydd nos Iau.

Mae'r gwaith buddugol, 'A Complicated Relationship between Heaven and Earth, or When We Believe', yn gyfres o eitemau symbolaidd sy'n cael eu defnyddio fel ffyrdd o gyrraedd trosgynoldeb crefyddol mewn amryw o ddiwylliannau gwahanol.

Dywedodd Mr Gates ei fod yn ddiolchgar i Artes Mundi am y platfform byd eang i ehangu cyd-destun ei waith.

Yn ôl cyfarwyddwr Artes Mundi, Karen Mackinnon, roedd Mr Gates yn rhagori oherwydd "ei allau nid yn unig fel artist, ond fel cynllunydd a hwylusydd dinesig ac fel curadur".

Cafodd Artes Mundi ei sefydlu yn 2002 fel gwobr sy'n cael ei rhoi bob dwy flynedd gan yr artist o Gymru Williams Wilkins gyda'r nod o gydnabod a chefnogi artistiaid gweledol o bob cwr o'r byd sy'n dal i geisio cael cydnabyddiaeth ryngwladol.

Image copyright Artes Mundi/Renata Lucas
Image caption Un o'r rhai ar y rhestr fer oedd 'Falha' (Methiant) gan Renata Lucas
Image copyright Artes Mundi/Ragnar Kjartansson
Image caption 'The Visitors' gan Ragnar Kjartansson oedd un arall fu'n ceisio am y wobr eleni
Image copyright Artes Mundi/Sanja Ivekovic
Image caption 'The Disobedient Revolutionaries' gan Sanja Ivekovic

Straeon perthnasol