Rhybudd gan feddyg i yrwyr ifanc

Aruni Sen Image copyright kevin hughes
Image caption Mae Mr Sen yn dweud fod damweiniau ffordd yn cynnwys gyrwyr ifanc yn gallu achosi "tor calon mawr i deuluoedd."

Mae ymgynghorydd damweiniau ac achosion brys yn galw ar yrwyr ifanc i gymryd gofal wrth iddynt fynd tu ôl i'r olwyn, gan ddweud ei fod yn anobeithio pan fydd yn rhaid iddo dorri newyddion drwg i berthnasau ar ôl damweiniau angheuol neu ddifrifol.

Dywedodd Aruni Sen, sy'n gweithio yn Ysbyty Maelor Wrecsam, "ar ôl 19 mlynedd yn gweithio, nid yw'n dod yn haws i ymdrin ag achosion o'r fath."

"Mae'r rhan fwyaf o gleifion rwy'n eu gweld sy'n yr ysbyty ar ôl damwain ddifrifol yn bobl ifanc," meddai.

Mae'n beio nifer o ffactorau gan gynnwys gor-yrru a phobl yn gwneud penderfyniadau gwael neu wirion ac yn achosi damweiniau.

Mae Mr Sen a meddyg teulu o Fôn, Dr Mike Blodau, wedi helpu i sefydlu Gwasanaeth Meddygol Brys Gogledd Cymru (NWEDS) yn 2010, gwasanaeth sy'n gweithio ar y cyd gydag Ymddiriedolaeth GIG a Gwasanaethau Ambiwlans Cymru i anfon meddygon gwirfoddol i ddigwyddiadau mawr megis gwrthdrawiadau cerbydau.

Dywedodd: "Mae'n ffaith syml bod mwyafrif o ddamweiniau sy'n arwain at anafiadau difrifol yn cynnwys gyrwyr sydd ond yn gymwys i yrru o fewn tair blynedd i'r ddamwain a bod 75% o'r rhai a anafwyd neu a laddwyd yn yrwyr ifanc o dan 23 mlwydd oed.

"Pan rydym yn wynebu marwolaeth claf, neu glaf sydd ag anafiadau difrifol, rydym fel yr heddlu i ryw raddau, wedi'n hyfforddi i ddelio â'r canlyniadau.

"Ond rwy'n dal i anobeithio ac yn dymuno y gall gyrrwr ifanc sydd wedi ei anafu neu'i ladd weld y boen a'r dinistr sy'n dod yn sgil eu gweithredoedd."