Cyhoeddi rhestrau Gwobrau'r Selar

Y Selar Image copyright Y Selar

Mae'r cylchgrawn cerddoriaeth gyfoes Y Selar wedi cyhoeddi y rhestrau byr llawn ar gyfer Gwobrau'r Selar eleni.

Bydd enillwyr pob un o'r 12 categori'n cael eu datgelu yng ngŵyl Gwobrau'r Selar yn Undeb Myfyrwyr Aberystwyth ar ddydd Sadwrn, 21 Chwefror.

Dywedodd golygydd Y Selar, Gwilym Dwyfor: "Roedd 2014 yn flwyddyn ddiddorol gydag amrywiaeth eang o gerddoriaeth yn cael ei ryddhau.

"Mae'r rhestrau byr yn adlewyrchu hynny i raddau gyda rhai o'r bandiau iau yn dechrau cystadlu benben â'r rhai sydd eisoes wedi gwneud eu marc."

"Mae 'na gwpl o'r rhestrau byr yn dal y llygad yn arbennig - mae wedi bod yn flwyddyn arall dda o ran artistiaid newydd, ac mae gen i ddiddordeb mawr gweld pwy o Tymbal, Ysgol Sul a Fleur de Lys fydd yn mynd â theitl y 'Band neu Artist Newydd Gorau.

Categori Newydd

Mae'r Selar hefyd wedi cyhoeddi bod categori newydd 'Offerynnwr Gorau' yn cael ei ychwanegu at y rhestr o wobrau eleni, gyda'r enillydd cyntaf i'w ddatgelu yn y digwyddiad ar 21 Chwefror.

"Mi wnaethon ni ofyn i'r cyhoedd awgrymu categorïau newydd y gallem ni fod yn eu cyflwyno, a phenderfynodd panel Gwobrau'r Selar bod Offerynnwr Gorau'n gyfle i dalu teyrnged i'r cerddorion hynny sydd efallai ddim mor amlwg ar y llwyfan, ond sydd â sgil arbennig," meddai Gwilym Dwyfor.

Rhestrau Byr Gwobrau'r Selar 2014

Record Fer Orau: Cofiwch Dryweryn - Y Ffug; Colli Cwsg - Yr Eira; Cynnydd / Gwenwyn - Sŵnami

Cân Orau: Neb ar ôl - Yws Gwynedd ; Cariad Dosbarth Canol Cymru - Y Ffug; Trysor - Yr Eira

Gwaith Celf Gorau: Arthur - Plu; Colli Cwsg - Yr Eira; Bodoli'n Ddistaw - Candelas

Hyrwyddwyr Gorau: Gŵyl Gwydir; 4 a 6 ; Cymdeithas yr Iaith Gymraeg

Cyflwynydd Cerddoriaeth Gorau: Lisa Gwilym ; Dyl Mei; Griff Lynch

Artist Unigol Gorau: Kizzy Crawford; Yws Gwynedd; Casi Wyn

Digwyddiad Byw Gorau: Gŵyl Crug Mawr; Maes B ; Gŵyl Gwydir

Fideo Cerddoriaeth Gorau: Cynt a'n Bellach - Candelas; Gwenwyn - Sŵnami ; Deud y Byddai'n Disgwyl - Cowbois Rhos Botwnnog

Record Hir Orau: Codi / \ Cysgu - Yws Gwynedd; Bodoli'n Ddistaw - Candelas; Codi'n Fore - Bromas

Band neu Artist Newydd Gorau: Fleur de Lys; Tymbal; Ysgol Sul

Band Gorau: Candelas ; Sŵnami; Y Ffug

Categori newydd: Enillydd i'w gyhoeddi ar y noson