Gwrthdrawiad: Cyhoeddi enw bachgen fu farw

Hamid Ali Khan Image copyright Heddlu De Cymru
Image caption Mae teulu Hamid Ali Khan wedi rhoi teyrnged iddo

Mae Heddlu De Cymru wedi cyhoeddi enw bachgen 12 oed fu farw wedi gwrthdrawiad gyda char yng Nghaerdydd.

Bu farw Hamid Ali Khan, o ardal Glan-yr-Afon, wedi'r gwrthdrawiad ar Ffordd Parc Ninian ar ddydd Gwener, 27 Chwefror.

Mewn teyrnged dywedodd ei deulu: "Roedd Hamid yn fab a brawd bendigedig. Roedden ni'n falch iawn ohono a phopeth y llwyddodd i gyflawni."

Roedd Hamid yn ddisgybl blwyddyn 7 yn Ysgol Fitzalan, Lecwydd, ac yn cefnogi timau pêl-droed Caerdydd a Chelsea.

Image caption Cafodd blodau eu gadael er cof am Hamid ar Ffordd Parc Ninian

Ychwanegodd ei deulu: "Roedd Hamid yn caru bywyd - byddai'n barod i fynd i'r ysgol bob dydd ac wedi cyffroi o gael dysgu rhywbeth newydd bob dydd.

"Rydyn ni i gyd yn hynod o drist ond wedi ein cysuro o wybod bod Hamid wedi cyflawni gymaint mewn bywyd mor fyr."

Dywedodd yr heddlu bod dyn 25 oed wedi ei arestio ar amheuaeth o achosi marwolaeth drwy yrru'n beryglus, ac wedi ei ryddhau ar fechnïaeth.

Mae'r heddlu hefyd yn apelio am wybodaeth am yr Audi S3 oedd yn rhan o'r gwrthdrawiad.

Straeon perthnasol