Dyfrnodau ar luniau maniffesto Plaid mewn camgymeriad

Maniffesto Plaid Cymru gyda dyfrnodau Image copyright Plaid Cymru
Image caption Dywedodd llefarydd Plaid Cymru bod y camgymeriad wedi cael ei gywiro'n gyflym

Mae Plaid Cymru'n dweud mai gwall dynol oedd wedi arwain i'w maniffesto gael ei gyhoeddi ar lein gyda dyfrnodau ar luniau.

Fe gafodd fersiwn ar-lein eu maniffesto ar gyfer yr etholiad cyffredinol ei gymryd oddi ar y we am gyfnod gan fod rhai lluniau'n dangos y geiriau "iStock by Getty Images" arnyn nhw.

Cafodd y ddogfen wedyn ei rhoi yn ôl ar lein heb y dyfrnodau.

Dywedodd llefarydd Plaid bod y camgymeriad wedi cael ei gywiro'n gyflym ar ôl i fersiwn hen gyda dyfrnodau gael ei roi ar lein am gyfnod.

Mae BBC Cymru wedi darganfod bod rhai o'r lluniau sy'n cael eu cynnwys yn y maniffesto hefyd yn cael eu defnyddio yn hysbysebu gwasanaethau iechyd yn Cinncinatti, cyngor ar afiechydon rhyw yn Seland Newydd a chlinig ar gyfer camddefnydd o sylweddau yn Utah.