Stephen Crabb yn croesawu cefnogaeth y banciau

Stephen Crabb (dde) yn arwain digwyddiad ymgyrch etholiadol yn Llanelwy
Image caption Stephen Crabb (dde) yn arwain digwyddiad ymgyrch etholiadol yn Llanelwy

Mae Ysgrifennydd Cymru Stephen Crabb wedi croesawu llythyr agored gan 100 o arweinwyr busnes yn cefnogi polisïau economaidd y Ceidwadwyr.

Yn eu plith mae Malcolm Walker, pennaeth cwmni Iceland Foods, o Sir y Fflint.

Mae'r llythyr yn rhybuddio y byddai llywodraeth Lafur yn "bygwth swyddi ac atal buddsoddiad".

Mae'r blaid Lafur wedi wfftio'r llythyr, a gafodd ei gyhoeddi ym mhapur newydd y Daily Telegraph ddydd Mercher.

Wrth ymgyrchu yn Llanelwy, dywedodd Mr Crabb y byddai polisïau'r Ceidwadwyr yn "dwyn ffrwyth" ar draws y wlad.

"Mae busnesau wedi dod ynghyd i ddweud, 'dydyn ni ddim angen troi ein cefnau ar y cynllun hwn - rydyn ni angen cadw at y llywodraeth sydd gennym, sydd wedi gwneud penderfyniadau anodd ac wedi cyflwyno sail ar gyfer adferiad economaidd cryf'", meddai wrth BBC Cymru.

"Mae yna nifer o enwau yna sydd wedi dechrau bywyd gydag ychydig iawn - maen nhw'n gwybod beth yw gwaith caled, adeiladu busnes a gweld y busnes hwnnw'n tyfu," ychwanegodd Mr Crabb.

"Maen nhw'n gwybod bod y polisïau rydyn ni wedi'u gosod allan ar gyfer y wlad yn gywir ar gyfer twf busnes."

Mae Duncan Bannatyne, Y Farwnes Karren Brady, Syr Cameron Mackintosh a sefydlydd Carphone Warehouse Syr Charles Dunstone ymhlith yr arweinwyr busnes sydd wedi arwyddo'r llythyr.