Bywyd newydd i hen injan stêm

Bydd 'Winifred' yn cludo teithwyr ar Reilffordd Llyn Tegid
Image caption Bydd 'Winifred' yn cludo teithwyr ar Reilffordd Llyn Tegid

Bydd hen injan stêm oedd yn arfer cael ei defnyddio yn chwarel y Penrhyn ym Methesda dros ganrif yn ôl yn cael ei dadorchuddio yng ngorsaf Llanuwchllyn ar Reilffordd Llyn Tegid ddydd Llun.

Dechreuodd injan 'Winifred' yn 1885, ond ar ôl i'r gwaith o dynnu llechi ddod i ben yn y 60au bu mewn amgueddfeydd yn yr UDA am ddegawdau tan i un o gefnogwyr Reilffordd Llyn Tegid, Julien Birley, ei phrynu ar gyfer ei hadnewyddu.

Cafodd yr injan ei chludo i Lanuwchllyn yn 2012 a fyth ers hynny mae gwirfoddolwyr a gweithwyr wedi gweithio'n ddyfal i'w thrwsio.

Ddydd Llun fe fydd yr hen injan yn 130 oed a'r bwriad yw ei defnyddio i gludo teithwyr yn hytrach na llechi fel yr oedd yn arfer ei wneud yn chwarel y Penrhyn.

Bydd 'Winifred' yn cael ei hail-lansio yn Llanuwchllyn gan Pete Waterman sydd wedi bod yn ddylanwadol iawn yn y diwydiant pop dros y blynyddoedd, ac mae'n gefnogwr brwd o reilffyrdd bychain y wlad.

Un arall fydd yn dathlu atgyfodiad 'Winifred' ddydd Llun ydi Emrys Austin Owen. Mr Owen oedd un o yrwyr olaf y trên tra roedd hi'n cael ei defnyddio yn chwarel y Penrhyn.

Image copyright Maid Marian Locomotive Fund
Image caption 'Winifred' yn chwarel y Penrhyn
Image copyright Robin G Willis
Image caption Winiffred yn nociau Manceinion, cyn cael ei chludo i'r UDA yn 1965