Beiciwr modur wedi marw ar ôl damwain yn Sir Benfro

Heddlu

Mae gyrrwr beic modur wedi marw ar ôl damwain ffordd yn Sir Benfro yn oriau cynnar dydd Iau.

Fe gafodd y gwasanaethau brys eu galw am 01:00 ar ôl i feic modur adael yr A4139 ym Mhenalun, ger Dinbych-y-pysgod.

Dywedodd llefarydd ar ran Heddlu Dyfed Powys: "Mae'r heddlu yn ymchwilio i achos y ddamwain - dim ond un cerbyd oedd yn rhan o'r digwyddiad.

"Bydd y ffordd yn parhau ynghau tra bod swyddogion yn archwilio safle'r ddamwain. Mae ein cydymdeimlad gyda theulu'r dyn a'i ffrindiau."

Mae Heddlu Dyfed Powys yn apelio am i unrhyw dystion i gysylltu â nhw ar 101.