Teulu dyn ar goll ar Ynys Wyth 'methu symud 'mlaen'

Michael Davies Image copyright Heddlu Hampshire
Image caption Roedd Michael Davies ar ei wyliau ar Ynys Wyth pan aeth ar goll

Mae teulu dyn o dde Cymru sydd ar goll ar Ynys Wyth wedi dweud nad ydyn nhw'n "gallu wynebu pethau a symud 'mlaen".

Roedd Michael Davies, 71 oed o'r Blaenau ym Mlaenau Gwent, wedi bod yn aros mewn gwesty gyda'i wraig pan ddiflannodd tua 21:30 ar 26 Mai.

Mae ei deulu wedi diolch i bobl sy' wedi chwilio amdano.

Dywedon nhw eu bod wedi bod am ymuno yn y chwilio ond ei bod yn anodd iddyn nhw ddychwelyd i'r ynys o Gymru.

'Brwydr'

Mewn datganiad dywedodd y teulu: "Mae pob dydd yn frwydr am ein bod ni'n teimlo nad ydyn ni yn gallu symud 'mlaen."

Diolchodd llefarydd ar ran yr heddlu y rhai gymrodd ran yn y chwilio ac ychwanegodd bod y llu yn parhau i weithio ar yr achos.

Does dim tystiolaeth i awgrymu bod Mr Davies yn gysylltiedig â throsedd ond mae pryder na all gael gafael ar feddyginiaeth ar gyfer pwysau gwaed.