Canlyniadau'r Cymry yng Nghynghrair Europa

Image caption Capten Y Drenewydd Matthew Cook (chw) yn herio'r Seintiau Newydd

Y Drenewydd 2-1 Valletta

Llwyddodd Y Drenewydd i guro FC Valletta o Malta o 2-1 yng nghymal cyntaf eu gêm yn rownd gyntaf y Gynghrair Europa.

Luke Boundford roddodd y tîm cartref ar y blaen yn fuan cyn yr egwyl wedi perfformiad cryf gan Y Drenewydd.

Daeth yr ymwelwyr yn ôl gyda 15 munud yn weddill, wrth i Benites da Conceicao sgorio.

Ond Y Drenewydd oedd yn fuddugol, wrth i Jason Oswell sgorio yn y funud olaf.

Differdange 3-1 Y Bala

Mae'r Bala wedi colli cymal cyntaf eu gêm nhw yn erbyn Differdange o Lwcsembwrg o 3-1.

Omar Er Rafik roddodd y tîm cartref ar y blaen, a munudau yn ddiweddarach fe basiodd i Gauthier Caron allu dyblu'r fantais.

Roedd hi'n 3-0 wrth i Dejvid Sinai rwydo gyda chymorth y postyn, ond fe wnaeth Ian Sheridan lwyddo i sgorio un i'r ymwelwyr.

Cafodd Mile Hayes ei yrru o'r cae yn hwyr yn y gêm, ar ôl cael ei ail gerdyn melyn.

Airbus UK Brychdyn 1-3 Lokomotiva Zagreb

Aeth Lokomotiva Zagreb o Groatia ar ei hôl hi yn erbyn Airbus cyn sgorio tair gôl i guro'r Cymry ar gae Nantporth Bangor.

Roedd Airbus ar y blaen erbyn yr egwyl wrth i Wayne Riley sgorio wedi 28 munud.

Ond ar ôl i Damir Sovsic sgorio gol gyntaf yr ymwelwyr, sgoriodd Mirko Maric a Marko Kolar i sicrhau'r fuddugoliaeth.

Llwyddodd golwr Airbus, James Coates i arbed cic o'r smotyn gan Sovsic yn hwyr yn y gêm.