Le Tour: Diwrnod da i Thomas

Geraint Thomas Image copyright Huw Evans picture agency

Fe gafodd Geraint Thomas ddiwrnod da yn ail gymal ras feicio'r Tour De France ddydd Sul, er iddo fod mewn damwain yn ystod y cymal.

Roedd Thomas yn rhan o ddamwain ychydig wedi'r sbrint hanner ffordd - damwain a welodd bedwar dyn yn disgyn - ond cododd yn ôl i'r cyfrwy i gwblhau cymal boddhaol dros ben i Team Sky.

Prif waith y Cymro dros y tair wythnos nesaf yw cynorthwyo prif seiclwr Team Sky, Chris Froome, i ennill y ras gyfan.

Ond ar ôl dau gymal Thomas sydd yn y pumed safle gyda Froome yn ddegfed wedi i'r ddau orffen yn y grŵp arweiniol yn Yr Iseldiroedd.

Yr Almaenwr Andre Griepel groesodd y llinell yn gyntaf gyda Peter Sagan yn ail a Fabian Cancellara'n drydydd i sicrhau'r siwmper felen ar gyfer y trydydd cymal ddydd Llun.

Mae Thomas 35 eiliad y tu ôl i Cancellara, ond yn bwysicach fe arweiniodd gwaith da'r Cymro at Froome yn agor bwlch dros nifer o'r rhai yr oedd disgwyl iddyn nhw ei herio yn y brif ras.

Mae Froome 48 eiliad o'r brig, ond mae Alberto Contador (+1m), Vincenzo Nibali (+2'9") a Nairo Quintana (+2'27") wedi colli cryn dipyn o dir ar bencampwr 2013.

Bydd y ras yn symud i Wlad Belg ddydd Llun gyda'r trydydd cymal o Antwerp i Huy. Mae'n gymal lle mae rhywfaint o obaith i Thomas ennill, ond mae'n mynnu mai ei waith e fydd hebrwng Froome i sefyllfa lle y gall ennill mwy o dir ar ei wrthwynebwyr.

Roedd y Cymro arall yn y ras, Luke Rowe, yn safle 139 ar ddiwedd dydd Sul ac mae bwlch o dros chwe munud rhyngddo a Cancellara, ond mae gan Rowe ei gyfrifoldebau i Team Sky, ac mae'n ymddangos bod y tîm yn hapus gyda'i gyfraniad hyd yma.

Image copyright EPA
Image caption Fabian Cancellara fydd â'r siwmper felen ddydd Llun

Straeon perthnasol