Angladd Trudy Jones wedi ymosodiad Tunisia

Trudy Jones Image copyright family via Gwent police
Image caption Roedd Trudy Jones yn un o 38 o bobl gafodd eu lladd yn yr ymosodiad ym mis Mehefin

Mae angladd Trudy Jones, un o'r 38 o bobl gafodd eu lladd mewn ymosodiad terfysgol ar draeth yn Tunisia, wedi cael ei gynnal ddydd Llun.

Cafodd y fam i bedwar ei lladd gan Seifeddine Rezgui yn Sousse ar 26 Mehefin.

Cafodd angladd Ms Jones, 51 oed o'r Coed Duon, Caerffili, ei gynnal yn Eglwys Dewi Sant, y Coed Duon.

Roedd yr eglwys yn orlawn a nifer yn aros yn y glaw y tu allan wrth i'w harch gael ei gario i mewn.

Roedd un deyrnged yn dweud: "Rydyn ni'n dy fethu gymaint. Buaswn i'n rhoi unrhyw beth yn y byd i dy gael hefo ni rŵan. 'Dwi ddim yn gwybod beth fyddwn ni'n ei wneud hebdda ti."

Dywedodd un arall: "I fy mam, fy ffrind gorau, fy mhopeth. Rwy'n dy garu mwy na alla'i roi mewn geiriau."

Clywodd cwest i'w marwolaeth mai un fwled a'i lladdodd.

Mewn datganiad dywedodd ei theulu: "O bawb doedd ein mam ddim yn haeddu hyn, roedd hi'n berson mor gariadus oedd yn rhoi pobl eraill yn gyntaf."