Cyhoeddi enw dyn gafodd ei ddarganfod mewn chwarel

Chwarel Llanddulas Image copyright Eirian Evans/Geograph
Image caption Fe gafodd gorff James Ivor Jones ei ddarganfod ger troed chwarel Llanddulas ddydd Iau

Mae'r heddlu wedi cyhoeddi enw dyn a gafodd ei ddarganfod yn farw mewn chwarel yng Nghonwy ddydd Iau.

Roedd James Ivor Jones, 50 oed o Landudno, yn gweithio fel capten cwch oedd yn cludo gweithiwyr i ffermydd gwynt oddi ar arfordir gogledd Cymru.

Yn agor cwest i'w farwolaeth yn Rhuthun, dywedodd y Crwner John Gittins bod gyrrwr oedd yn teithio ar yr A547 wedi gweld y dyn ger y chwarel yn Llanddulas.

Fe gafodd gorff Mr Jones ei ddarganfod ger troed y chwarel, gyda'i gar gerllaw.

Dywedodd yr heddlu nad oedd amgylchiadau amheus i'r farwolaeth.

Y casgliad rhagarweiniol gafodd ei roi gan y patholegydd Dr Mark Atkinson oedd mai nifer o anafiadau oedd achos y farwolaeth.

Fe gafodd y cwest ei ohirio am y tro.