First Great Western: Streiciau Gŵyl Banc

Image caption Amharodd streic Gorffennaf 2015 ar gynlluniau miloedd o deithwyr

Fe fydd gweithwyr First Great Western yn cynnal rhagor o streiciau, gan gynnwys ar benwythnos gŵyl y banc, yn ôl undeb gweithwyr rheilffordd yr RMT.

Mae'r streiciau'n rhan o ymgyrch yn erbyn newidiadau arfaethedig i batrymau gwaith pan fydd trenau InterCity yn cael eu newid i rai Hitachi.

Mae FGW yn gyfrifol am wasanaethau rhwng gorsaf Paddington yn Llundain a de Cymru.

Cynhaliwyd streic 48 awr yn gynharach y mis hwn, gan effeithio ar filoedd o gymudwyr.

Image copyright AFP
Image caption Delwedd artist o'r trenau newydd, fydd yn cymryd lle'r hen drenau sy'n dyddio nôl i'r 70au

Mae'r undeb yn bryderus na fydd gardiaid na cherbydau bwffe ar y trenau newydd fydd yn cael eu cyflwyno yn 2017.

Bydd aelodau'r RMT, gan gynnwys gyrwyr a gardiaid, ar streic am 24 awr ar 23 Awst ac am 72 awr o 29 Awst ymlaen, tra bydd staff cynnal a chadw yn streicio ar 29 Awst a 31 Awst.

Mewn llythyr agored i gwsmeriaid beth amser yn ôl, dywedodd Mark Hopwood o FGW y byddai mwy, nid llai, o staff ar y trenau newydd.

Dywedodd y byddai telerau ac amodau presennol y staff yn cael eu gwarchod, ac na fyddai yna unrhyw ddiswyddiadau gorfodol ar gyfer staff yn y gorsafoedd nac yn yr adran gwasanaethau cwsmer.