Pedwar cap newydd i herio Iwerddon

James Hook
Image caption Bydd James Hook yn cael cyfle arall i brofi ei allu fel maswr Cymru

Mae Warren Gatland wedi dewis tîm dibrofiad i wynebu Iwerddon dydd Sadwrn.

Bydd y blaenasgellwr Ross Moriarty yn chwarae i Gymru am y tro cyntaf.

Mae'n un o bedwar cap newydd ar gyfer y gêm, yn cynnwys y clo Dominic Day, y canolwr Tyler Morgan, a'r asgellwr Eli Walker.

Mae'r gêm yn gyfle i hyfforddwyr Cymru weld aelodau llai profiadol y garfan yn perfformio cyn Cwpan y Byd.

James Hook fydd y maswr - cyfle arall iddo brofi ei allu fel rhif 10. Mike Phillips fydd y mewnwr.

Y canolwr Scott Williams yw'r capten.

Yn dilyn y gêm mae disgwyl i Gatland leihau maint y garfan hyfforddi o 47 i tua 37.

Bydd y garfan o 31 ar gyfer Cwpan y Byd yn cael ei henwi erbyn diwedd mis Awst.

Mae pob tocyn wedi eu gwerthu ar gyfer y gêm.

Tîm Cymru i wynebu Iwerddon:

Hallam Amos, Alex Cuthbert, Tyler Morgan, Scott Williams (Capten), Eli Walker, James Hook, Mike Phillips; Nicky Smith, Richard Hibbard, Aaron Jarvis, Jake Ball, Dominic Day, Ross Moriarty, Justin Tipuric, Dan Baker.

Eilyddion: Rob Evans, Kristian Dacey, Scott Andrews, James King, Taulupe Faletau, Lloyd Williams, Gareth Anscombe, Matthew Morgan.

Image copyright Getty Images
Image caption Ross Moriarty, blaenasgellwr newydd Cymru

Dywedodd Warren Gatland: "Rydym wedi rhoi'r chwaraewyr o dan bwysau mawr ac maen nhw wedi ymateb yn dda iawn.

"Dyma eu cyfle i ddangos eu gallu ar y llwyfan rhyngwladol.

"Mae gennym y cyfuniad iawn o'r ifanc a'r profiadol ac mae'n achlysur enfawr - Iwerddon yn dod i'r dre', a stadiwm sy'n orlawn."

Straeon perthnasol