Chris Coleman: 'Cymru angen pwyllo cyn gêm Israel'

bale Image copyright Getty Images
Image caption Bale yn codi i sgorio

Dywed rheolwr Cymru Chris Coleman ei bod hi'n bwysig fod chwaraewyr Cymru "ddim yn colli arni" a bod yna waith i'w wneud cyn bod Cymru yn llwyddo i gyrraedd Euro 2016.

Mae Cymru o fewn un gêm i gyrraedd y rowndiau terfynol ar ôl buddugoliaeth 1-0 yn erbyn Cyprus yn erbyn Nicosia nos Iau.

Bydd Cymru yn chwarae Israel yng Nghaerdydd ddydd Sul.

Byddai buddugoliaeth yn ddigon i sicrhau lle i Gymru yn y rowndiau terfynol yn Ffrainc.

Dywedodd Coleman y dylai cefnogwyr fwynhau'r fuddugoliaeth yng Nghyprus.

"Maen nhw wedi aros amser hir, mae'n gyfle iddyn nhw fwynhau." meddai.

"Ond rhaid i ni beidio colli arni.

"Gallai i ddim gwneud hynny, na'r chwaraewr na'r staff - a gwnawn ni ddim.

"Dim bwys sut rydym yn ei wneud o, os rydym wedi blino yn gorfforol neu yn feddyliol, ond mae'n rhaid i ni baratoi ein hunain ar gyfer gem fawr arall.

"Mae'n rhaid i ni gyrraedd y disgwyliadau mawr. Rydym wedi gwneud hynny hyd yn hyn, a gobeithio gallwn wneud o eto."

Nid oes modd chwarae darnau sain a fideo ar eich dyfais
Gareth Bale yn sgorio'n fyw ar Newyddion 9
Image copyright Reuters

Mae Cymru ar frig grŵp B gyda 17 pwynt.

Daeth buddugoliaeth Cymru nos Iau, diolch i beniad pwerus Gareth Bale yn dilyn croesiad Jazz Richards naw munud cyn diwedd y gêm

Ar ddechrau'r rowndiau rhagbrofol, Cymru oedd y pedwerydd detholion yn y grwp y tu ôl i Wlad Belg, Bosnia Hercegovina ac Israel.

Cymru sydd bellach ar frig y grwp, yn nawfed ymysg detholion y byd ac o fewn un gêm i gyrraedd rowndiau terfynol un o brif gystadlaethau'r byd am y tro cyntaf ers 1958.