Gatland yn gwneud tri newid i wynebu Fiji

warren Gatland Image copyright Huw Evans picture agency
Image caption Mae Warren Gatland wedi gwneud tri o newidiadau

Mae Cymru wedi cyhoeddi enw'r 15 fydd yn wynebu Fiji yn Stadiwm y Mileniwm, Caerdydd am 16:45 dydd Iau.

Matthew Morgan sydd wedi ei ddewis yn gefnwr yn absenoldeb Liam Williams.

Mae'n un o dri newid i'r tîm drechodd Lloegr yn Twickenham.

Hefyd wedi eu dewis mae'r asgellwr Alex Cuthbert (Gleision) a'r canolwr Tyler Morgan (Dreigiau).

Mae gweddill y tîm yn aros yr un fath a'r un wnaeth guro Lloegr 25-28 yn Twickenham.

Mae James Hook wedi ei ddewis ymhlith yr eilyddion.

Image copyright Huw Evans picture agency
Image caption Bydd Matthew Morgan yn ennill ei bumed cap yn erbyn Fiji

Pe bai Cymru'n ennill yna byddant yn mynd i frig Grŵp A am y tro.

Bydd Lloegr yn wynebu Awstralia yn Twickenham nos Sadwrn am 20:00.

Bu'n rhaid i hyfforddwr Cymru wneud nifer o newidiadau yn dilyn mwy o anafiadau i'w olwyr yn y fuddugoliaeth yn erbyn Lloegr ddydd Sadwrn.

Mae'r canolwr Scott Williams a'r asgellwr Hallam Amos allan o'r gystadleuaeth a bydd yn rhaid i'r cefnwr Liam Williams golli'r gêm yn erbyn Fiji wedi iddo ddioddef anaf i'w ben.

"Mae'n bwysig ein bod yn adeiladu ar lwyddiant a momentwm y penwythnos," meddai Warren Gatland.

"Mae Fiji wed perfformio yn ddau yn eu gemau agoriadol, a byddant yn gobeithio adeiladu ar hynny.

"Rydym wedi gwneud tri o newidiadau oherwydd anafiadau ond rydym wedi dewis tîm cryf.

"Rydym yn edrych ymlaen at ddychwelyd i Stadiwm y Mileniwm ddydd Iau, a chael y dorf i'n cefnogi mewn gem bwysig."

Cymru: Matthew Morgan; Alex Cuthbert, Tyler Morgan, Jamie Roberts, George North, Dan Biggar, Gareth Davies; Gethin Jenkins, Scott Baldwin, Tomas Francis, Bradley Davies, Alun Wyn Jones, Dan Lydiate, Sam Warburton (Capten), Taulupe Faletau.

Eilyddion: Ken Owens, Aaron Jarvis, Samson Lee, Luke Charteris, Justin Tipuric, Lloyd Williams, Rhys Priestland, James Hook.

Am fwy o gyffro Cwpan Rygbi'r Byd ewch i'n is-hafan arbennig.