Cymru yn wyth olaf Cwpan y Byd

Owen Farrell Image copyright Getty Images
Image caption Owen Farrell yn cael ei anfon o'r cae, gan olygu fod Lloegr yn gorffen y gêm gydag 14 o chwaraewyr

Mae tîm rygbi Cymru drwodd i round go gynderfynol Cwpan Y Byd diolch i fuddugoliaeth Awstralia o 33-13 yn Twickenham.

Perfformiad gwych gan y maswr Bernard Foley, gyda dau drosgais a phedwar cic cosb, roddodd terfyn ar obeithion y Saeson.

Golygai'r canlyniad fod Awstralia a Chymru ar frig grŵp A gyda 13 pwynt yr un, a Lloegr yn drydydd gyda 6.

Dim ond un gêm sy'n weddill, ac yr uchafswm y gallai Lloegr nawr ei gael yw 11 pwynt.

Mae'n rhaid i Gymru guro Awstralia yn Twickenham ddydd Sadwrn nesaf er mwyn gorffen ar frig y grŵp.

Her fawr

Bydd eu gwrthwynebwyr yn y rownd go gynderfynol yn dod o grŵp B, ac yn dibynnu ar ganlyniadau, gallant wynebu De Affrica, Yr Alban neu Japan.

Y tebygrwydd yw y bydd y tîm sy'n gorffen yn ail yng ngrŵp Cymru yn wynebu De Affrica.

Nid oes modd chwarae darnau sain a fideo ar eich dyfais
Adroddiad Cennydd Davies o Twickenham

Dywedodd Gwyn Jones, cyn gapten Cymru, y bydd Cymru yn wynebu talcen caled yn erbyn Awstralia.

"Rydym wedi gwneud beth oedd angen ei wneud, i guro Lloegr yn Twickenham, Fiji ac Uruguay...rydym drwodd mewn grŵp anodd. Dyw rhywun ddim yn gallu gofyn mwy.

"Buddugoliaeth Awstralai oedd y perfformiad gorau gan unrhyw dim yng Nghwpan y Byd hyd yma, gan gynnwys Seland Newydd. I guro Lloegr o 20 yn Twickenham mewn gem mor fawr - mae'n rhoi Awstralia mewn safle gwych ar gyfer gweddill y gystadleuaeth," meddai.

"Mae ei sgrym yn gadarn a sail gadarn i'r blaenwyr - ac mae pawb yn gwybod bod eu holwyr mor beryglus.

"Maen nhw'n dîm peryglus a bydd yna her mor fawr yn wynebu tîm Cymru ddydd Sadwrn nesa."