Rhyddhau ffilm Saesneg Dan y Wenallt

Drama Image copyright Richard Brewis

Bydd addasiad Saesneg o ddrama Under Milk Wood gan Dylan Thomas, gyda Rhys Ifans a Charlotte Church yn serennu, yn cael ei dangos yn y sinemâu am y tro cyntaf ddydd Gwener.

Mae fersiwn Gymraeg o'r ffilm, Dan y Wenallt, wedi ei rhyddhau'n barod ac fe gafodd y ddwy fersiwn eu ffilmio gefn-wrth-gefn.

Cafodd cyfarwyddwr y ffilm, Kevin Allen, ganmoliaeth pan gafodd y fersiwn Gymraeg ei rhyddhau.

Hwn yw cynnig y DU ar gyfer enwebiad Ffilm Iaith Dramor Orau (ddim yn yr iaith Saesneg) yn seremoni'r Oscars.

Dywedodd Rhys Ifans fod y ffilm yn "llawn hwyl a dwndwr erotig".

Cafodd y ddrama wreiddiol ei chomisiynu gan y BBC a'i pherfformio am y tro cyntaf yn Efrog Newydd yn 1953 - cyn ei darlledu am y tro cyntaf gan y BBC ym mis Ionawr 1954 - ddau fis wedi i Dylan Thomas farw.

Cafodd y fersiwn Gymraeg a Saesneg ei ffilmio o gwmpas pentref Solfach yn Sir Benfro ac mae'n portreadu bywyd a breuddwydion pobl ym mhentref dychmygol Llareggub.

Image copyright Arall