Euro 2016: Enwau o'r het

Wales celebrate at full-time Image copyright Getty Images

Bydd tîm pêl-droed Cymru'n cael gwybod brynhawn Sadwrn pwy fydd yn eu hwynebu yn Euro 2016.

Bydd yr enwau'n cael eu tynnu o'r het ar gyfer y bencampwriaeth yn Ffrainc mewn seremoni ym Mharis am 17:00.

Ar ôl ymgyrch arwrol yn y rowndiau rhagbrofol, mae'r tîm cenedlaethol yn mynd i un o brif gystadlaethau pêl-droed y byd am y tro cyntaf ers 1958.

Mae 24 gwlad yn y bencampwriaeth, ac mae Cymru'n sicr o wynebu un o dimau cryfaf Ewrop.

Bydd posib dilyn y cyffro wrth i'r enwau ddod o'r het ar lif byw arbennig Cymru Fyw sy'n cychwyn am 16:30.

'Cyfle gwych'

Mae seren Cymru, Gareth Bale, yn meddwl fod gan y garfan "gyfle gwych" i ennill y bencampwriaeth.

"Rwy'n credu'n wirioneddol fod gennyn ni gyfle gwych i ennill os gawn ni ychydig o lwc ac os wnawn ni chwarae'n gêm ni," meddai Bale. "Pam lai?"

Yn siarad ar raglen Sport Wales y BBC, dywedodd ymosodwr Real Madrid: "Dim mynd yno i gymryd rhan ydyn ni. 'Dyn ni'n mynd yno i wneud jobyn iawn a cheisio ennill y bencampwriaeth.

"Does dim pwynt mynd yno i fod yn dîm eilradd."

Ychwanegodd Bale ei fod yn edrych ymlaen at wynebu timau gorau'r byd.

"'Dyn ni eisiau chwarae ar y llwyfan mwyaf a phrofi'n hunain yn erbyn y timau gorau," meddai.

"Bydd rhaid gwneud hynny yn y bencampwriaeth. Mae rhaid bod yn uchelgeisiol. Dyna'r cynllun.

"Rwy'n siŵr na fydd unrhyw wlad arall yn edrych ymlaen at ein hwynebu ni. 'Dyn ni'n gryf, mae gennyn ni ysbryd gwych a lot o gymeriad, a 'dyn ni'n chwarae pêl-droed da hefyd."

Image copyright Cymdeithas Bel-droed Cymru
Image caption Cyrhaeddodd Chris Coleman a'r tîm rheoli ym Mharis fore Gwener

Dyma'r holl wybodaeth am bwy all tîm Chris Coleman fod yn herio ym mis Mehefin.

Cofiwch y gallwch ddilyn llif byw arbennig Cymru Fyw wrth i'r enwau ddod o'r het.

24 tîm

Dyma'r tro cyntaf i'r gystadleuaeth gynnwys 24 tîm yn y rowndiau terfynol, ac mae'r timau wedi eu rhannu i bedwar pot.

Fel y tîm cartref, mae Ffrainc ym mhot 1, gyda'r timau gorau yn ôl detholion UEFA.

Mae Cymru ym mhot 4, ac yn sicr o wynebu un o'r timau cryfaf yn y gystadleuaeth.

Bydd y timau yn cael eu tynnu i chwe grŵp gyda phedwar tîm ym mhob un.

Y timau

Pot 1

Yma mae'r enwau mwyaf yn y gystadleuaeth. Mae Ffrainc yma fel y tîm cartref, ond hefyd pencampwyr y byd, Yr Almaen.

Hefyd yma mae Gwlad Belg, tîm wnaeth Cymru guro yn ystod y rowndiau rhagbrofol - rhyw gysur i ddynion Coleman?

  • Ffrainc - (eisoes yng ngrŵp A)
  • Gwlad Belg
  • Lloegr
  • Portiwgal
  • Sbaen
  • Yr Almaen

Pot 2

Yr Eidal yw'r enw mwyaf yn y pot yma, ond mae digon o dimau cryf eraill hefyd, gan gynnwys Awstria a'r Swistir.

  • Awstria
  • Croatia
  • Rwsia
  • Wcraen
  • Y Swistir
  • Yr Eidal

Pot 3

Llwyddodd Hwngari a Sweden i gyrraedd y rowndiau terfynol drwy'r gemau ail-gyfle, ond oherwydd rhestr detholion UEFA, maen nhw ym mhot 3.

  • Gweriniaeth Tsiec
  • Gwlad Pwyl
  • Hwngari
  • Rwmania
  • Slofacia
  • Sweden

Pot 4

Yma mae Cymru ac felly ni fydd y cochion yn wynebu unrhyw un arall o'r pot yma yn rownd y grŵp.

  • Albania
  • Cymru
  • Gogledd Iwerddon
  • Gweriniaeth Iwerddon
  • Gwlad yr Iâ
  • Twrci
Image caption Bydd tynged Cymru yn nwylo'r dyn yma ddydd Sadwrn, Ruud Gullit

Y timau ym mhot 1 fydd yn cael eu dewis gyntaf, ac yna pot 4 cyn potiau 3 a 2.

Y ddau dîm uchaf ym mhob grŵp, a'r pedwar tîm gorau wnaeth orffen yn drydydd yn y grŵpiau, fydd yn symud ymlaen i rownd yr 16 olaf.

Ddydd Sadwrn, cyn-gapten yr Iseldiroedd, Ruud Gullit a chyn-chwaraewr Ffrainc, Bixente Lizarazu, fydd â'r cyfrifoldeb o ddewis yr enwau.

Fe gewch chi'r dadansoddiad ar Raglen Dewi Llwyd ar BBC Radio Cymru fore Sul, yng nghwmni cyn ymosodwr Cymru, Iwan Roberts ac Ian Gwyn Hughes o Gymdeithas Bêl-droed Cymru.

Straeon perthnasol