Tynnu enw ymgeisydd UKIP o'r rhestr

Kevin Mahoney
Image caption Dywedodd Mr Mahoney ei fod yn falch bod aelodau nawr yn cael dewis yr ymgeiswyr

Mae cynghorydd UKIP wnaeth gyhuddo'r blaid o "ffrindgarwch" wedi ei dynnu oddi ar restr o ymgeiswyr posib ar gyfer etholiad y Cynulliad.

Dywedodd Kevin Mahoney y byddai'n gadael y blaid petai'r cyn Aelodau Seneddol Ceidwadol, Neil Hamilton a Mark Reckless yn cael eu dewis fel ymgeiswyr.

Cafodd Mr Mahoney wybod am y penderfyniad mewn cyfarfod o bwyllgor Cymreig y blaid ddydd Sadwrn.

Bydd nawr yn aelod annibynnol ar Gyngor Bro Morgannwg.

Dewis ymgeiswyr

Yn y cyfarfod, fe wnaeth y blaid hefyd benderfynu sut y bydd ymgeiswyr rhanbarthol yn cael eu dewis, wedi misoedd o ffraeo mewnol.

Bydd pob aelod o UKIP yng Nghymru yn cael papur pleidleisio ac yn cael dewis pwy maen nhw am weld yn eu cynrychioli. Bydd y canlyniadau yn cael eu cadarnhau gan gorff annibynnol.

Dywedodd Dave Rowlands o UKIP yng Nghymru bod y mater wedi ei ddatrys, a'i fod yn gobeithio na fyddai'n cymryd "mwy na tair i bedair wythnos".

Ddydd Iau, fe wnaeth sawl ymgeisydd alw ar Nathan Gill i ymddiswyddo oherwydd y ffraeo.

Dywedodd Kevin Mahoney: "Rydw i'n falch bod fy ngwrthwynebiad cyhoeddus i'r ffrindgarwch gwleidyddol o fewn UKIP a'r arweinyddiaeth yn genedlaethol ac yng Nghymru wedi arwain at roi pleidlais i bob aelod yng Nghymru am drefn y rhestr, rhywbeth nad oedd ganddyn nhw o'r blaen."

Straeon perthnasol