Cyflenwad dŵr wedi ei adfer

Welsh Water engineers fixing the burst mains Image copyright Dwr Cymru
Image caption Mae peirianwyr wedi cwblhau'r gwaith atgyweirio

Mae peirianwyr wedi atgyweirio pibell ddŵr sy'n cyflenwi dŵr i nifer o gymunedau yn nwyrain Sir Gaerfyrddin.

Dywed Dŵr Cymru eu bod yn credu fod y bibell, sy'n cyflenwi Trap, Llandybie, Cross Hands, Tymbl, Gorslas, Penygroes a Charmel, wedi torri o ganlyniad i symudiad yn y tir gafodd ei achosi gan y tywydd gwlyb.

Bu peirianwyr wrthi ers nos Fawrth yn gwneud gwaith atgyweirio, yn y cyfamser bu tanceri yn cludo dŵr er mwyn sicrhau bod cyflenwadau ar gael.

Roedd dŵr potel yn cael ei ddarparu ar gyfer pobl ag anghenion arbennig a theuluoedd gyda babanod.

"Mae cyflenwadau yn cael eu hadfer ond fe allai'r dŵr fod o liw gwahanol am gyfnod," meddai llefarydd ar ran Dŵr Cymru.

"Rydym yn ymddiheuro am unrhyw anghyfleustra ac yn diolch i gwsmeriaid am fod yn amyneddgar tra bod ni'n cwblhau'r gwaith atgyweirio. "

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.