Cymru 1-1 Gogledd Iwerddon

Church penalty Image copyright PA
Image caption Simon Church yn dod a'r sgôr yn gyfartal

Sgoriodd Simon Church gyda chic o'r smotyn yn hwyr yn y gêm i sicrhau gêm gyfartal i Gymru yn erbyn Gogledd Iwerddon yn Stadiwm Dinas Caerdydd.

Hon oedd gêm gartref olaf Cymru cyn i'r tîm gystadlu ym mhencampwriaeth Euro 2016 yn Ffrainc ym Mehefin.

Daeth y gic o'r smotyn ar ôl i Chruch gael ei lorio gan Gareth McAuley yn y blwch cosbi.

Craig Cathcart roddodd Gogledd Iwerddon ar y blaen ar ôl yr egwyl wedi i Gymru fethu a chlirio'r bêl yn dilyn cic gornel.

Ar ôl y gêm dywedodd rheolwr Cymru Chris Coleman ei fod yn hapus iawn gyda pherfformiad y chwaraewyr, gan ddweud "byddaf wedi bod yn hapus gyda'r perfformiad hyd yn oed pe ba'i ni wedi colli 1-0.

"Roedd yna berfformiadau da gan nifer."

Image copyright Getty Images
Image caption Craig Cathcart (rhif 20) yn rhoi Gogledd Iwerddon ar y blaen

Aeth Cymru i'r gêm heb nifer o'u prif chwaraewyr gan gynnwys Gareth Bale ac Aaron Ramsey.

Roedd yn gyfle felly i'r rheolwr weld pa chwaraewyr eraill y dylai gynnwys yn y garfan derfynol fydd yn teithio i Ffrainc.

'Chwarae gyda balchder'

Ddydd Llun fe fydd Cymru oddi cartref i'r Wcráin, prawf anoddach fyth i dîm Coleman.

Er gwaeth absenoldeb y sêr, roedd Cymru gystal os nad gwell na'r Gwyddelod yn yr hanner cyntaf, ond heb greu fawr o gyfleoedd.

David Cotterill ddaeth agosaf, ei gic rydd yn cael ei arbed gan Michael McGovern.

Image copyright Getty Images
Image caption Roedd yna berfformiad cadarn a medrus Ashley Williams yn yr amddiffyn

Ond roedd Gogledd Iwerddon yn edrych fymryn yn fwy bygythiol wedi'r egwyl, ac yn dilyn cornel fe wnaeth Craig Cathcart ergydio i gefn y rhwyd.

Dywedodd Coleman: "Fe wnaeth y bechgyn chwarae gyda balchder, heb saith neu wyth fyddai fel arfer yn dechrau i ni.

"Roedd yna nifer o ffactorau positif, roeddwn yn falch iawn i Sam Vokes wnaeth yn dda i ni, a Simon Church, wnaeth o argraff ar y gêm.

"Mae un neu ddau o chwaraewyr wedi ei gwneud yn fwy anodd i mi ddewis pwy fydd y 23 ar gyfer yr Euros nawr!"

Image copyright Reuters
Image caption Tom Lawrence yn brwydro am y bêl