Arestio dyn o Fro Morgannwg wedi marwolaeth yn Kenya

Richard Alden Image copyright Wales News Service
Image caption Mae Richard Alden yn byw yn Nairobi gyda'i wraig.

Mae dyn busnes o Fro Morgannwg wedi ei arestio yn Kenya ar ôl i fenyw farw ar ôl cael ei saethu.

Cafodd Richard Alden, 53 oed, o'r Bontfaen ei gadw'n y ddalfa ddydd Sadwrn wedi i Grace Kinyanjui, 42 oed, farw. Yn ôl cyfreithiwr Mr Alden, cafodd Ms Kinuanui ei lladd ar ôl i'r gwn roedd hi'n ei ddal danio'n ddamweiniol.

Aeth Mr Alden â Ms Kinyanjui i'r ysbyty ond roedd wedi marw.

Bydd yn cael ei ddal gan yr heddlu tan ddydd Gwener tra bo swyddogion yn cynnal ymchwiliad i lofruddiaeth.

Cymryd 'hunluniau'

Dywedodd ei gyfreithiwr, Evans Monari: "O'r hyn rwy'n ei glywed, roedd hi'n cymryd lluniau, 'hunluniau', wrth i'r gwn gael ei danio."

Ychwanegodd fod y digwyddiad yn ymwneud â phistol, a'i fod wedi ei danio tra roedd Ms Kinuanjui yn nhŷ Mr Alden yn ardal Karen yn Nairobi, yn ei helpu i symud.

"Mae Richard yn dweud nad fe sy'n gyfrifol," meddai Mr Monari. "Fe saethodd y ferch ei hun ar ddamwain."

Image copyright Wales News Service
Image caption Roedd Grace Kinyanjui yn rheoli cwmni diogelwch.

Dechreuodd yr heddlu ymchwilio i lofruddiaeth yn dilyn adroddiadau fod meddygon yn credu bod Ms Kinyanjui wedi ei thrywannu, a bod rhai o'i bysedd wedi torri.

Honnodd yr heddlu fod Mr Alden a Ms Kinyanjui - oedd yn rhedeg cwmni diogelwch - mewn perthynas â'i gilydd. Mae Mr Alden yn byw yn Nairobi gyda'i wraig, Martine, ac mae ganddo dri o blant.

Roedd Mrs Alden yn Llundain dros y penwythnos ond hedfanodd yn ôl ar gyfer y gwrandawiad.

Does dim cyhuddiadau wedi eu cyflwyno yn yr achos.

Mae disgwyl i ganlyniadau archwiliad post-mortem a phrofion balistig gael eu cyhoeddi ddydd Gwener.