Consortiwm o America yn cwblhau prynu clwb Abertawe

Jason Levien Image copyright Getty Images
Image caption Mae Jason Levien yn rhan o dîm rheoli DC United yn America

Mae consortiwm o'r Unol Daleithiau wedi cwblhau prynu cyfran fwyafrifol yng Nghlwb Pêl-droed Dinas Abertawe.

Jason Levien a Steve Kaplan, sydd â phrofiad yn rhedeg timau chwaraeon yn America, sy'n arwain y consortiwm sydd wedi prynu 68% o'r clwb.

Fe wnaeth y perchnogion newydd, gafodd ganiatâd i brynu'r clwb gan yr Uwch Gynghrair ddechrau'r mis, gwblhau'r cytundeb yn dilyn cyfarfod gyda'r cadeirydd, Huw Jenkins.

Mae Ymddiriedolaeth Cefnogwyr Abertawe yn cadw eu cyfran o 21% o berchnogaeth y clwb.

Er hyn, dywedodd yr ymddiriedolaeth ei fod yn "siomedig" nad oedd wedi'i gynnwys yn unrhyw drafodaethau.

Image copyright Huw Evans picture agency
Image caption Mae'r BBC ar ddeall bod y perchnogion newydd yn awyddus i brynu Stadiwm Liberty

Bydd Jenkins yn aros yn ei rôl fel cadeirydd, gyda'r is-gadeirydd Leigh Dineen hefyd yn aros.

Mae'r BBC ar ddeall bod y perchnogion newydd hefyd yn awyddus i brynu Stadiwm Liberty.

Y cyngor sy'n berchen ar y stadiwm ar hyn o bryd, a byddai ei brynu yn galluogi i'r perchnogion newydd gynyddu ei faint.