Saunders: 'Anodd' i Gymru gadw Chris Coleman

Dean Saunders

Mae cyn ymosodwr Cymru, Dean Saunders yn dweud y bydd Cymdeithas Bêl-droed Cymru yn ei chael hi'n anodd cadw'r rheolwr Chris Coleman, ar ôl llwyddiant Cymru ym Mhencampwriaeth Euro 2016.

Dyma oedd y tro cyntaf i Gymru fod mewn pencampwriaeth fawr ers 1958, ac fe gyrhaeddodd y tîm y rownd gyn derfynol cyn golli o 2-0 yn erbyn Portiwgal.

Yn siarad gyda Reuters, dywedodd Saunders: "Dwi ddim yn gwybod os bydd y Gymdeithas Bêl-droed yn gallu dal eu gafael yn Chris.

"Dwi'n meddwl y bydd rhywun yn dod ac yn neidio ar y cyfle i'w wneud yn rheolwr.

"Ar hyn o bryd mae ei broffil mor uchel felly fydden ni ddim yn synnu os yw wedi cael cynigion gan glybiau yn yr Uwch Gynghrair neu i fynd dramor. Dwi'n dychmygu mai dyna sy'n digwydd ar y funud."

Disgwyliadau'n uchel

Cyn rheoli Cymru, roedd Coleman yn rheolwr ar glybiau fel Fulham, Real Sociedad a Larissa.

Yn ôl Saunders mae'n bosib bod hyfforddwr Cymru yn colli'r gwaith dyddiol gyda chlwb cynghrair.

"Dydych chi ddim yn cael llawer o amser gyda'r chwaraewyr, dydych chi ddim ar y cae hyfforddi bob dydd a dyna'r peth gorau am fod yn hyfforddwr," meddai.

"Dim strach, dim ond gwylio'r bechgyn yn chwarae pêl-droed ac mae'n siŵr bod Chris yn colli'r elfen hynny."

Image copyright Rex Features
Image caption Mae Chris Coleman wedi bod yn rheoli Cymru ers 2012

Dywedodd hefyd bod Coleman wedi defnyddio'r tactegau cywir yn ystod Euro 2016 ac y bydd disgwyliadau'r cefnogwyr yn uchel ar gyfer y gemau nesaf yn ymgyrch Cwpan y Byd 2018.

"Mae 'na nifer o chwaraewyr ifanc yn y tîm, maen nhw wedi cael sawl cap ac fe ddylen nhw nawr fod yn edrych ymlaen at yr ymgyrch nesaf.

"Mae'n rhaid i'r chwaraewyr yn y tîm dan 21, dan 19 hefyd feddwl, 'dwi eisiau cael fy newis, dwi eisiau bod yn rhan o hynny'."