Rio: Tîm rygbi 7-pob-ochr Prydain yn y ffeinal

Team GB Image copyright Getty Images
Image caption James Davies (ail o'r chwith) yn dathlu'r fuddugoliaeth yn erbyn De Affrica

Mae tîm rygbi 7-pob-ochr dynion Prydain yn sicr o ennill o leiaf medal arian yng Ngemau Olympaidd Rio ar ôl iddyn nhw sicrhau eu lle yn y ffeinal.

Bydd Team GB yn herio Fiji yn hwyr nos Iau ar ôl trechu De Affrica o 7-5 yn y rownd gynderfynol.

Mae dau o Gymru yn rhan o'r garfan - y Scarlet James Davies a chwaraewr 7-pob-ochr rhyngwladol Cymru, Sam Cross.

Roedd De Affrica ar y blaen o 5-0 ar yr hanner cyn i gais Dan Norton a throsiad Tom Mitchell roi Prydain ar y blaen yn gynnar yn yr ail hanner.

Mae'r tîm eisoes wedi trechu Kenya, Japan, Seland Newydd ac Ariannin yn y gystadleuaeth.