Morgannwg: Ar y blaen wedi diwrnod da

will bragg Image copyright Huw Evans picture agency
Image caption Mae Will Bragg yn dal yna ar 41 heb fod allan

Am unwaith y tymor hwn roedd hi'n drueni gweld y tywydd yn amharu ar y chwarae yng Nghaerdydd wrth i Forgannwg ymestyn eu mantais yn erbyn Sussex.

Fe wnaeth Morgannwg orffen y trydydd diwrnod o chwarae yn erbyn Sussex 118 rhediad ar y blaen gydag wyth wiced yn weddill.

Wedi perfformiad caboledig gan y bowlwyr ddydd Mercher, fe ddechreuodd Morgannwg ar 50 am 1. Fe gollwyd wiced Jacques Rudolph am 47, ond fe ddaeth hynny â David Lloyd at y llain yn bartner i Will Bragg, ac roedd y ddau yn edrych yn gyfforddus am weddill y dydd.

Fe gollwyd cryn dipyn o chwarae i'r tywydd, ond roedd y ddau yna pan ddaeth y chwarae i ben yn fuan gyda'r cyfanswm ar 149 am 2 gyda Bragg ar 41 h.f.a. a Lloyd ar 37 h.f.a..

Os fydd y tywydd yn well ar y diwrnod olaf ddydd Gwener, fe fydd gan y capten Mark Wallace benderfyniad anodd i'w wneud - dod â'r batiad i ben yn gynnar wrth geisio am fuddugoliaeth neu mynd amdani gyda'r bat yn y bore a gobeithio medru bowlio Sussex allan yn gyflym.

Gyda'r holl amser a gollwyd, gêm gyfartal yw'r canlyniad mwyaf tebygol.

Morgannwg v. Sussex - Ail Adran Pencampwriaeth y Siroedd:

Morgannwg (batiad cyntaf) = 252

(ail fatiad) = 149 am 2

Sussex (batiad cyntaf) = 283