Caerdydd yn arwyddo'r golwr Ben Amos ar fenthyg

  • 26 Awst 2016
ben amos Image copyright Getty Images
Image caption Fe ddechreuodd Ben Amos ei yrfa gyda Manchester United

Mae Caerdydd wedi cadarnhau eu bod wedi arwyddo golwr Bolton, Ben Amos ar fenthyg am y tymor.

Fe dreuliodd Amos ei gyfnod fel chwaraewr ieuenctid gyda Manchester United, gan chwarae saith gêm i'r clwb.

Ar ôl cyfnodau ar fenthyg gydag Oldham, Hull a Bolton fe symudodd Amos, sydd yn 26 oed, i Stadiwm Macron yn barhaol yn 2015.

David Marshall yw dewis cyntaf y clwb yn y gôl ar hyn o bryd, ond mae'r rheolwr Paul Trollope wedi bod yn awyddus i arwyddo golwr arall wedi i Joe Lewis a Simon Moore adael dros yr haf.

Mae perchennog Aston Villa, Dr Tony Xia hefyd wedi dweud bod y clwb wedi cytuno i adael i'r cefnwr chwith Joe Bennett symud i Gaerdydd am ddim.

Yn y cyfamser mae Caerdydd wedi cadarnhau eu bod wedi cytuno i ddiddymu cytundeb y chwaraewr canol cae Kagisho Dikgacoi.