Anrhydeddu Ian Woosnam yn 'oriel anfarwolion' y byd golff

Ian Woosnam Image copyright Rex Features

Mae'r golffiwr Ian Woosnam wedi dweud ei fod yn teimlo anrhydedd mawr o ennill ei le yn oriel anfarwolion golff.

Wrth ymateb i'r newyddion ar ei gyfri Twitter, dywedodd ei fod yn falch o gael ymuno â chymaint o'i gyd-bencampwyr.

Ymhlith uchafbwyntiau Woosnam ar y cwrs gollf oedd ennill pencampwriaeth y Masters yn Augusta yn 1991 ac arwain Ewrop i fuddugolaeth y Cwpan Ryder yn 2006.

Image copyright Ian Woosnam/Twitter
Image caption Ian Woosnam ymhlith chwaraewyr golff gorau'r byd.

Chafodd Woosnam, 58 oed, ddim o'i ddewis i'r oriel anfarwolion yn 2015, er iddo ar un adeg fod yn chwaraewr gorau'r byd, ac mae e wedi dweud yn y gorffennol nad yw'n deall pam na chafodd ei anrhydeddu'n gynt.

Mae Woosnam wedi ennill 52 o deitlau proffesiynol, mwy na Mark O'Meara (34) a David Graham (38) sydd hefyd ymhlith goreuon y byd.

Dywedodd Llywydd y Neuadd Enwogion, Jack Peter: "Mae Ian wedi cael gyrfa syfrdanol ac wedi cael cefnogaeth aruthrol gan y cyfryngau, pleidleiswyr a chefnogwyr yn ystod y broses yma."