Cyhuddiadau ychwanegol yn achos blacmel Farhan Mirza

Farhan Mirza Image copyright Wales News Service

Mae dyn o dde Cymru sydd wedi ei gyhuddo o flacmel bellach yn wynebu cyhuddiadau o ymosodiad rhyw hefyd.

Clywodd Llys y Goron Caerdydd bod Farhan Mirza, 38 o Abertyleri, bellach yn wynebu dau gyhuddiad ychwanegol o ymosodiad rhywiol.

Cafodd yr honiadau eu gwneud gan dyst i'r erlyniad yn ystod yr achos.

Yn ystod ei thystiolaeth, fe wnaeth y ddynes honni bod y diffynnydd wedi cyffwrdd "yn uchel ar ei choes" heb ei chaniatâd pan oedden nhw'n eistedd ar fainc.

Mae hi hefyd wedi honni bod y diffynnydd wedi rhoi ei llaw ar ei drowsus heb ei chaniatâd pan oedden nhw'n eistedd mewn car.

Fe wnaeth Mr Mirza wadu'r ddau gyhuddiad yn y llys ddydd Llun.

Fe wnaeth y barnwr ganiatáu'r cyhuddiadau newydd yn dilyn cais gan yr erlyniad.

Mae Mr Mirza nawr yn wynebu cyhuddiadau o flacmel, voyeuriaeth, dwyn, twyll ac ymosodiad rhyw.

Mae'n gwadu pob un o'r cyhuddiadau ac mae'r achos yn parhau.

Straeon perthnasol