Gweilch i wynebu Stade yn y Principality

Principality Stadium Image copyright Huw Evans Agency
Image caption Bydd y gêm yn cael ei chwarae yn Stadiwm y Principality ar 2 Ebrill

Fe fydd gêm y Gweilch yn erbyn Stade Francais yn rownd gogynderfynol Cwpan Her Ewrop yn cael ei chwarae yn Stadiwm y Principality ddydd Sul 2 Ebrill am 17:45.

Does dim modd i'r clwb chwarae'r gêm ar Stadiwm y Liberty oherwydd bod clwb pêl-droed Abertawe'n chwarae yno ar yr un diwrnod yn erbyn Middlesbrough yn yr Uwch Gynghrair.

Fe fydd y gêm honno'n cael ei darlledu yn fyw ar y teledu.

'Dim dewis'

Dywedodd Rheolwr Gyfarwyddwr y Gweilch, Andrew Millward, ei bod yn anffodus iawn fod y gêm wedi gorfod cael ei symud.

Mae gêm y Gweilch hefyd yn cael ei darlledu, ac yn ôl Mr Millward, oherwydd amodau'r cytundeb darlledu, roedd yn rhaid chwarae'r gêm brynhawn Sul: "Felly doedd yna ddim dewis ond chwilio am le arall i chwarae'r gêm."

"Rydym yn ddiolchgar i'm cyfeillion yn Undeb Rygbi Cymru, sydd wedi'n cynorthwyo ni i allu i chwarae'r gêm bwysig hon yn Stadiwm y Principality.

"Gyda phum wythnos i fynd cyn y gêm, mae'n bwysig fod pawb nawr yn cydweithio er mwyn sicrhau fod y gêm a'r achlysur yn llwyddiant. "