Cwest Llanrwst: 'Fflamau' mewn sychwr dillad

  • 19 Ebrill 2017
Doug McTavish and Bernard Hender
Image caption Bu farw Doug McTavish a Bernard Hender yn y digwyddiad yn Llanrwst

Mae cwest i farwolaeth dau ddyn o Lanrwst mewn tân yn y dre wedi clywed bod fflamau wedi eu gweld yn dod o sychwr dillad yn eu fflat.

Cafodd Doug McTavish, 39 oed, a Bernard Hender, 19 oed, eu lladd yn y tân ym mis Hydref 2014.

Llwyddodd trydydd dyn, Garry Lloyd Jones i ddianc o'r adeilad.

Roedd y tri dyn yn rhannu fflat uwchben busnes ymgymerwyr Mr Lloyd Jones ar Sgwâr Ancaster.

Roedd e a Mr McTavish hefyd yn rheoli bistro cyfagos ar y cyd.

Fflamau

Ar y noson y dechreuodd y tân, roedd sychwr dillad yn cael ei ddefnyddio i sychu tywelion o'r bwyty.

Tra'n rhoi tystiolaeth i'r cwest, dywedodd Mr Lloyd Jones ei fod wedi sicrhau fod y sychwr wedi ei ddiffodd cyn iddo fynd i'r gwely yn oriau mân y bore, ac iddo sylwi fod y drws yn agored a thywelion ynddo.

Aeth ymlaen i ddweud fod yr ystafell yn llawn mwg pan ddeffrodd am 06:00.

Pan aeth i chwilio am darddiad y mwg, gwelodd fod fflamau'n dod o grombil y sychwr.

Dywedodd ei fod wedi ceisio ddeffro'r dynion eraill, a'i fod wedi llwyddo i ddianc drwy lithro o'r fflat ar ei fol, cyn galw'r gwasanethau brys o ffôn cyhoeddus ar y sgwar.

Mae disgwyl i'r cwest barhau am dri diwrnod.