Poster prin The Beatles yn gwerthu am £28,000

  • 24 Mai 2017
Poster Image copyright Wales News Service

Mae poster prin yn hysbysebu cyngerdd The Beatles oedd ym meddiant y gantores Mary Hopkin wedi ei werthu mewn arwerthiant am £28,000.

Roedd disgwyl i'r poster, sy'n dyddio'n ôl i 1963, gael ei werthu am oddeutu £400 i £800 fel rhan o gasgliad o eitemau o'r cyfnod oedd ar werth gan y gantores.

Mary Hopkin o Bontardawe oedd un o'r artistiaid cyntaf i arwyddo i label Apple Records band The Beatles.

Mae'r gantores, ddaeth i frig y siartiau yn 1968 gyda'r gân Those Were The Days, hefyd yn gwerthu nifer o wisgoedd o'r cyfnod.

Image caption Daeth Mary Hopkin yn enwog wedi iddi ennill sioe dalent Opportunity Knocks pan yn 18 oed.

Mae'r poster yn hysbysebu cyngerdd The Beatles o fis Awst 1963 ym Mhafiliwn y Pier, Llandudno.

Yn ystod yr un mis yn 1963 fe gyhoeddodd y band eu hail gân i gyrraedd brig y siartiau, sef 'She Loves You', ac fe ddechreuodd Beatlemania ar draws y byd.

Cafodd y poster ei werthu mewn arwerthiant ym Mae Colwyn.

Cyn yr arwerthiant dywedodd yr arwerthwr Ben Rogers Jones: "Fy ngobaith i yw y bydd yn mynd i rywun lleol i'r ardal oedd yn y gig ond mae'n sicr y bydd diddordeb mawr o lefydd eraill gan fod y farchnad am nwyddau'r Beatles yn anferthol."

Bydd y cwmni'n gwerthu nifer o wisgoedd y gantores yng Nghaerdydd ar 2 Mehefin.