Real Madrid a Bale yn ennill Cynghrair y Pencampwyr

  • 3 Mehefin 2017
Real Madrid Image copyright Getty Images
Image caption Dyma'r ail flwyddyn yn olynol i Real Madrid ennill Cynghrair y Pencampwyr

Roedd ymosodwr Cymru a Real Madrid, Gareth Bale yn rhan o'r tîm enillodd Cynghrair y pencampwyr yng Nghaerdydd nos Sadwrn.

Er i Bale beidio dechrau'r gêm fe ddaeth ar y cae gyda 13 o funudau yn weddill o'r gêm i wynebu Juventus.

Cristiano Ronaldo oedd seren y gêm wrth iddo sgorio dwy allan o'r bedair gôl i Real Madrid.

Real aeth ar y blaen yn gyntaf gydag ergyd gan Ronaldo cyn i Mario Mandzukic sgorio gôl wych i Juventus gyda chic dros ei ben.

Roedd y gêm yn gyfartal 1 - 1 ar yr egwyl.

Image copyright Getty Images
Image caption Fe ddaeth Bale ymlaen gyda 13 munud o'r gêm yn weddill

Fe ddechreuodd yr ail hanner yn danllyd ond Real Madrid oedd yn rheoli'r meddiant.

Sgoriodd Casemiro ail gol i Real gydag ergyd o du allan i'r cwrt cosbi a gymerodd gyffyrddiad ar ei ffordd i'r rhwyd oddi ar chwaraewr Juventus.

Fe aeth dwy yn dair wrth i Ronaldo dorri calonnau'r Eidalwyr pan gyfeiriodd y bêl am ei ail o'r gêm.

Gyda'r sgôr yn 3 - 1 dyma Gareth Bale yn camu i'r cae i gymeradwyaeth uchel Stadiwm Cenedlaethol Cymru.

Gyda phum munud yn weddill roedd Juventus lawr i 10 dyn ar ôl i'r eilydd Juan Cuadrado weld ei ail garden felen o'r gêm.

Yn munudau olaf y gêm, gyda chyrff blinedig roedd Real Madrid yn llwyr reoli'r gêm a fe sgoriodd Marco Asensio bedwaredd Real yn dilyn croesiad gan Marcello.

Roedd hynny yn ddigon i sicrhau'r tlws i Real Madrid am yr ail flwyddyn yn olynol ac yn sicrhau bod Bale yn cael codi'r gwpan yn ei ddinas enedigol.

Image copyright Getty Images
Image caption Doedd gôl wych Mario Mandzukic ddim digon i Juventus

Dywedodd Gareth Bale ar ddiwedd y gêm:

"Mae Caerdydd wedi gwneud gwaith gwych fel dinas i gael y gêm ymlaen ac rydym i gyd yn ddiolchgar o hynny.

"Roedd hi'n freuddwyd i mi ennill y gystadleuaeth yma yng Nghaerdydd, mae hi wedi bod yn dymor anodd i mi o ran anafiadau ond dwi wrth fy modd," meddai.

Straeon perthnasol