Penfro'n paratoi i ddadorchuddio cerflun o Harri VII

  • 8 Mehefin 2017
Harri vii
Image caption Gosod y cerflun yn ei gartref newydd ger Castell Penfro

Mae tref hanesyddol yn Sir Benfro yn paratoi i ddadorchuddio cerflun efydd i ddathlu un o feibion enwocaf Penfro.

Ganwyd Harri Tudur yng Nghastell Penfro yn 1457, yn fab i Margaret Beaufort ac Edmund Tudur.

Yn 1485, fe drechodd byddin Richard III ym mrwydr Bosworth ac fe goronwyd yn Harri VII, a'r unig Gymro i fod yn frenin Lloegr a Chymru.

Mae'r cerflun, sy'n mesur wyth troedfedd, yn cyrraedd Sir Benfro ddydd Iau cyn cael ei ddadorchuddio mewn seremoni arbennig ddydd Sadwrn.

Image caption Bydd cerflun Harri VII yn cael ei ddardorchuddio ddydd Sadwrn

Bydd y cerflun yn sefyll ar bont yn edrych allan tuag at Gastell Penfro.

Mae pobl leol wedi cyfrannu £20,000 tuag at gost y cerflun, gyda chyngor Sir Benfro a Valero yn cyfrannu cyfanswm o £30,000.

Y cerflunydd Harriet Addyman fodelodd y darn cyn iddo gael ei orchuddio mewn efydd.

Image caption Ganwyd Harri VII yng Nghastell Penfro yn 1457

Gobaith rhai pobl yn lleol yw sefydlu canolfan Harri VII ym Mhenfro ac mae arian wedi'i ddiogelu ar gyfer astudiaeth i weld a fyddai hynny'n bosib.

Dywedodd y Cynghorydd Linda Asman ei bod wedi ei "ysbrydoli" i ddilyn y syniad yn dilyn ymweliad â chanolfan Richard III yng Nghaerlŷr.

Dywedodd wrth BBC Cymru bod "diddordeb mawr" ymysg pobl leol yn y syniad.