Hen fam-gu yn euog o alwad bom ffug yng Nghaerdydd

Deirdre Murphy Image copyright Wales news service
Image caption Dywedodd Deirdre Murphy fod ei galwad ffug "yn anghywir yn llygad y gyfraith" ond ei bod yn "teimlo ei fod yn bwysig"

Mae rheithgor wedi cael hen fam-gu yn euog o wneud galwad ffug yn dweud bod bom yn Arena Motorpoint, Caerdydd.

Roedd Deirdre Murphy, 62, wedi dweud iddi wneud yr alwad er mwyn amharu ar ffair arfau.

Yn Llys y Goron Caerdydd, dywedodd Murphy - sydd wedi ymgyrchu yn erbyn y fasnach arfau ers sawl blwyddyn - ei bod am wagio'r adeilad er mwyn sicrhau nad oedd arfau'n cael eu prynu a'u gwerthu.

Fe'i cafwyd yn euog o ddau achos o gyfleu gwybodaeth ffug yn fwriadol a bydd hi'n cael eu dedfrydu ddydd Mercher.

'Teimlo ei fod yn bwysig'

Wrth gloi ei hachos fe apeliodd Murphy ar y rheithgor i'w chael yn ddieuog, gan ddweud: "Rwy'n gwybod bod beth wnes i yn anghywir yn llygad y gyfraith, ond roeddwn ni'n teimlo ei fod yn bwysig."

Roedd hefyd wedi nodi bod Nelson Mandela wedi ei ddisgrifio fel terfysgwr ac wedi torri'r gyfraith ar y pryd.

Wrth gael ei chroesholi, fe gytunodd Ms Murphy ei bod hi'n ymwybodol nad oedd bom yn yr adeilad pan wnaeth yr alwad i Heddlu De Cymru a chwmni Media Wales.

Dywedodd y barnwr Eleri Rees nad oedd "barn gref" Murphy ar werthiant arfau yn rhoi'r hawl iddi dorri'r gyfraith.

Disgrifiodd hi'r achos fel un "anarferol ond mor bwysig ag unrhyw un arall."

Pynciau Cysylltiedig