Rheoli Cymru fydd 'anrhydedd fwyaf' gyrfa Ryan Giggs

Giggs Image copyright Getty Images

Rheoli ei wlad am y tro cyntaf fydd "anrhydedd" mwyaf ei yrfa hyd yma, yn ôl Ryan Giggs.

Bydd tîm pêl-droed Cymru yn chwarae eu gem gyntaf yng Nghwpan China ddydd Iau, a hynny yn erbyn y tîm cartref yn Nanning.

Hon fydd gem gyntaf Giggs wrth y llyw ar ôl iddo gal ei benodi fel olynydd i Chris Coleman ym mis Ionawr.

'Llawer mwy nerfus'

Mewn cynhadledd ddydd Mercher, dywedodd: "Byddai'n llawer mwy nerfus yfory.

"Do'n i ddim wir yn mynd yn nerfus fel chwaraewr, ond mae mynd i mewn i reoli yn gwbl wahanol gan bod cymaint o bethau i feddwl amdanyn nhw."

Image copyright Getty Images
Image caption Doedd Ryan Giggs ddim yn fodlon cadarnhau os bydd Gareth Bale yn dechrau'r gêm yn erbyn China ddydd Iau

Ac er ei fod o wedi ennill medalau di-ri' fel chwaraewr hefo Manchester United, mae Giggs yn dweud mai rheoli ei wlad am y tro cyntaf fydd "eiliad mwyaf balch" ei yrfa.

"Dwi'n falch o gael bod yn rheolwr Cymru ac yn hyfforddi'r grŵp yma o chwaraewyr.

"Dwi llawn cyffro ar gyfer y gêm. Dwi wedi bod yn y swydd am ddeufis a dyma pam wnes i gymryd y swydd, ar gyfer y pêl-droed."

'Profiad gwych i bawb'

Ar ôl y gêm yn erbyn China, bydd Cymru'n wynebu un ai Uruguay neu'r Weriniaeth Tsiec ddydd Llun.

Yn ôl yr is-reolwr, Osian Roberts mae'r tîm yn cymryd y gystadleuaeth gyfeillgar o ddifri': "Mae'n gystadleuaeth, mae'n gwpan, a 'da ni isio mynd allan yna i'w hennill hi.

"Does na'm cymaint o gemau cyfeillgar bellach, ac oherwydd hynny maen nhw'n fwy o gemau cystadleuol, sydd gobeithio yn mynd i ddod a'r gorau allan o'n chwaraewyr ni.

"Mae ganddon ni rywbeth i anelu ato, mae'n mynd i fod yn brofiad gwych i bawb, ac edrych ymlaen at y gystadleuaeth."

Gallwch wylio'r gêm yn fyw ar Cymru Fyw, gyda sylwebaeth BBC Radio Cymru, am 11:25 ddydd Iau.

Straeon perthnasol