Ubujurire bw'abantu 17 baregwa iterabwoba mu Rwanda

Bamwe mu bashinjwa (mu mwenda w'iroza)
Image caption Bamwe mu bashinjwa (mu mwenda w'iroza) barikumwe n'abashinzwe umutekano

Urukiko rukuru rwa Kigali rwatangiye kumva mu muhezo ubujurire bw'abantu 17 baregwa iterabwoba.

Aba bahakana iki cyaha bagasaba gufungurwa bagakurikiranwa bari hanze.

Umutekano wakajijwe cyane ku rukiko bigaragara ko ari urubanza rudasanzwe.

Icyumba cy'urukiko cyari cyakubise cyuzuye.

Imbaga yari ihari yari yiganjemo abagaragaza ko ari abayoboke b'idini ya Islam ndetse n'abo mu miryango y'abaregwa.

Image caption Icyumba cy'urukiko cyari cyuzuye

Bamwe muri bo bari bambaye imyambaro igaragaza idini, abagore bamwe ndetse bambaye ku buryo bubahisha amasura.

Gusa aba bose ntibashoboye gukurikira urubanza kubera ko urukiko rwategetse ko rukomeza mu muhezo.

Abaregwa baraburana mu bujurire basaba iseswa ry'icyemezo cy'umucamanza wa mbere kibafunga iminsi 30 y'agateganyo.

Mu rukiko rwabanje umucamanza yari yavuze ko aba bagomba gukomeza gufungwa by'agateganyo kugira ngo badacika ubutabera kubera ko ibyaha baregwa bikomeye.

Umucamanza uvuga ko yashingiye ku byemewe na bamwe mu baregwa ndetse n'ubuhamya bwatanzwe na Imam Mugemangango yavuze ko aba bari bahuriye mu mugambi wo kurema umutwe w'iterabwoba .

Image caption Umutekano wakajijwe cyane ku rukiko bigaragara ko ari urubanza rudasanzwe.

Ngo hari n'abafatiwe ku kibuga cy'indege berekeza mu gihugu cya Syria aho bagombaga kwinjira mu mutwe wa Islamic State.

Gusa abo mu miryango y'abaregwa bakagaragaza ugutangazwa n'ukuntu umucamanza yashingira ku buhamya bw'umuntu wapfuye.

Uyu uvugwa ni Mouhamad Mugemangango wishwe n'igipolisi kivuga ko yari agiye gutoroka mu gihe na we yari akurikiranyweho ibyaha nk'ibi.

Mu ntangiro z'uyu mwaka ni bwo benshi muri aba bafashwe.

Igipolisi cyabanje kugira ibanga rikomeye ifatwa ry'aba bantu kiza kwemera ko kibafite nyuma y'urupfu rwa Mugemangango na we bivugwa ko yari mu mugambi umwe n'aba.

Abaregwa bahakana ibyaha

Bararegwa kurema umutwe w'iterabwoba ugamije kwifatanya n'umutwe wa Islamic State.

Umucamanza avuga ko bamwe babyemereye mu ibazwa abandi bakabishinjwa na Mugemangango.

Abaregwa 17 barimo abakobwa 3 bose bagaragara nk'abakiri bato.

Nubwo ubushinjacyaha buvuga ko harimo abemeye byaha mu ibazwa, bose bahakaniye umucamanza ko nta sano bafitanye n'iterabwoba.

Abenshi bavuga ko bari abanyeshuri,barimo abari abakozi ba Leta ndetse n'abikorera ku giti cyabo.

Kumva abantu bashinjwa iterabwoba ryo kuri uru rwego bisa n'ibyatunguye abantu kuko ari bishya mu gihugu.

Gusa igipolisi cyo kivuga ko ibi bikorwa byari bitangiye kwaduka uretse ko kivuga ko igihugu gifite ubushobozi bwo guhangana n'igikorwa icyo ari cyose cy'iterabwoba.

Ibindi bisa n’ibi