Jean Baptiste Bagaza wahoze ari perezida w'u Burundi yapfuye

Perezida Jean Baptiste Bagaza Uwufise ububasha kw’isanamu AFP
Image caption Perezida Jean Baptiste Bagaza yategetse u Burudni hagati ya 1976 na 1987.

Umujyanama ushinzwe amakuru mu biro bya perezida w'u Burundi, Willy Nyamitwe, yemeje amakuru y'urupfu rwa Jean Baptiste Bagaza, anyuze ku rubuga nkoranyambaga rwa Twitter.

Yagize ati: "Ni impamo, uwahoze ari perezida Jean Baptiste Bagaza yatabarukiye, mu Bubiligi ku itariki 4/05/2016, mu gitondo. Yari umusenateri ubuzima bwe bwose".

Amakuru y'urupfu rwa Bwana Bagaza yabanje gukwirakwizwa ku mbuga nkoranyambaga ku wa Kabiri ariko Willy Nyamitwe yanyuze kuri izo mbuga nyine nawe, arayahakana avuga ko nta shingiro afite.

Si ubwa mbere urupfu rwa Bwana Bagaza ruhwihwiswa mu buryo bw'imburagihe.

Mu kwezi kwa Munani 2015, byavuzwe ko Jean Baptiste Bagaza yapfuye ariko mu kiganiro yahaye BBC Gahuzamiryango, yemeje ko akiri muzima kandi ko aho yari ari yari mutaraga.

Uwufise ububasha kw’isanamu Willy Nyamitwe

Gusa yemeje ko nawe yari amaze iminsi abibona ku mbuga za interineti, ariko avuga ko kubibeshyuza bitoroshye.

Avugana na BBC, uyu mugabo wahoze ari umukuru w'igihugu cy'u Burundi yavuze ko yifuza kutuganirira ku bimaze iminsi mu Burundi bijyanye na politike.

Icyo gihe yatangaje ko muri make ku bwe ngo ibimaze iminsi biba byerekana ko ubutegetsi bunaniwe.

Bagaza yari kuzuzuza imyaka 70 y'amavuko mu kwezi kwa Munani uyu mwaka.

Yapfiriye mu bitaro mu Bubiligi nyuma y'igihe kinini arwaye.

Bwana bagaza wari n'umusirikare w'ipeta rya Koloneli, yategetse u Burundi hagati y'umwaka wa 1976 na 1987.

Ashimwa cyane kubera byinshi mu bikorwaremezo ndetse n'inganda biri mu gihugu, byubatswe ku butegetsi bwe.

Bwana Bagaza yavuye ku butegetsi ahiritswe na Majoro Pierre Buyoya mu mwaka wa 1987.

Leta y'u Burundi yatangaje iminsi itatu y'icyunamo mu kunamira Bwana Bagaza.

Ibindi bisa n’ibi