Arangiye icyiciro cya kabiri cya kaminuza yandikisha amano!

Jean Twagirimana yavukanye ubumuga bwatumye amaboko ye ntacyo yamumarira
Image caption Jean Twagirimana yavukanye ubumuga bwatumye amaboko ye ntacyo yamumarira

Umugabo ubana n'ubumuga bwo kutagira amaboko washoboye kwiga yandikisha amano arangije icyiciro cya kaminuza cya Masters.

Uwo ni Jean Twagirimana wo mu Rwanda. Avuga ko ababana n'ubumuga barushijeho gufashwa bashobora kuba bahangana mu buzima busanzwe n'abadafite ubumuga.

Twagirimana atuye mu murenge wa Mayange mu Karere ka Bugesera. Umusore w'imyaka 31 yavukanye ubumuga bw'amaboko yombi adashobora kugira icyo ayakoresha, habe no gufata ikaramu.

Yagize ati:

"Nyuma yo kubaona ko mfite ubumuga bw'amaboko ababyeyi bitabaje abahanga mu byiciro bitandukanye bababwira ko ubwo amaboko adashobora gukora ariko izindi ngingo zishobora gukora. Banyigisha kwandika nkoresheje amano. ni muri ubwo buryo bantoje gufata ikaramu mu mano. Ntangira kwiga ndanatsinda, kugeza kuri uru rwego ndacyakoresha amano."

Akoresheje amano, abasha guhindaguranya impapuro z'ikaye, akanayakoresha mu kwandika.

Image caption Byinshi mu byo akora abikoresha amano

Mu mashuri makuru yize umwuga wo kwigisha ndetse no mu cyiciro cya mbere cya kaminuza; ariko ngo yaje kubona ko bidahagije.

"Amasomo nari nagiye gukurikirana ni amasomo y'uburezi budaheza; uburezi bw'abantu bafite ubumuga. Nahisemo kuba nakurikira aya masomo kubera ko nabonaga ko hari byinshi nkeneye kumenya naba ntarabonye ndetse maze kubona ko na barumuna banjye nyuma bagifite ibibazo nk'ibyo bashobora kuzanyura muri aya masomo."

Si byose akoresha amano. Hari ibyo ashobora kwikorera birimo kuba yakoza mu kanwa akoresheje uburoso bw'amenyo, kwambara inkweto cyangwa kuzikuramo ndetse no kurya ariko byo ngo yakwirisha iyo ari mu rugo iwe gusa.

Image caption Yarinze yiga amashuri yose adakoresheje amaboko mu kwandika

N'ubwo bimeze gutyo ariko ngo ntibyamworoheye kubera ko aho agiye hose agomba kugira undi muntu umuherekeza mu kumufasha kumukorera ibyo we adashoboye.

Avuga ko nta vangura yigeze ahura na ryo ko ariko hagombye kubaho ubuvugizi bukomeye bwakorerwa ababana n'ubumuga mu buryo bwo kubafasha ku isoko ry'umurimo.

Yasobanuye agira ati:

"Haracyarimo imbogamizi kuko kenshi usanga dukeneye ibikoresho bitandukanye n'ibyo abandi baba bafite mu kazi mu buzima busanwe....Ubwo bufasha ntibuba buhari. Haracyari imbogamizi kuba abantu batari baramenya ibikoresho abantu bafite ubumuga bakeneye kugira ngo babashe kwinjira mu kazi."

Image caption Amano ye ni bwo buryo yitabaza muri byinshi

Jean Twagirimana avuga ko ababana n'ubumuga bashoboye gufashwa mu myigire yabo bashobora guhangana mu nzego zitandukanye bikabarinda gusabiriza.