Abadepite 48 babaye bahagaritswe muri Zambia

Umukuru w'abatavugarumwe n'ubutegetsi, Hakainde Hichilema, araregwa ubugambanyi Uwufise ububasha kw’isanamu AFP
Image caption Umukuru w'abatavugarumwe n'ubutegetsi, Hakainde Hichilema, araregwa ubugambanyi

Banze kwitabira iryo jambo mu kwezi kwa gatatu bavuga ko Bwana Lungu atatsinze mu buryo bwemewe n'amategeko amatora y'umwaka ushize.

Ikinyamakuru Lusaka Times cyandikirwa muri Zambia cyasubiyemo amagambo y'umukuru w'inteko ishingamategeko, Patrick Matibini, avuga ko ukutitabira iryo jambo kw'abo badepite kwabaye "imyitwarire mibi ikabije".

Iri hagarikwa ribaye inyuma yaho umukuru w'ishyaka ritavuga rumwe n'ubutegetsi rya UPND, Hakainde Hichilema, afungiwe ashinjwa ubugambanyi.

Leta ya Zambia yanenzwe n'inama nkuru y'abepisikopi gatolika muri icyo gihugu kubera ukuntu yitwaye mu kibazo cya Bwana Hichilema. Aba basenyeri baburiye ko Zambia iri kunyerera yerekeza ku "butegetsi bw'igitugu".

Aba badepite 48 bahagaritswe bangana hafi n'umubare wose w'abadepite 58 bahagarariye ishyaka mu nteko nshimagategeko.

Gasopo ku badepite

Bwana Matibini yavuze ko guhagarikwa kw'abadepite guhise gutangira.

Yagize ati: "Mboneyeho no guha gasopo aba bayoboke ba UPND ko nibakomeza kutemera Perezida, bagombye guhita bashyira mu gaciro bakegura".

Zambia iri mu bibazo bya politiki kuva Bwana Hichilema yatabwa muri yombi mu kwezi kwa kane, aregwa kuba urukurikirane rw'imodoka rwari ruherekeje imodoka ye rwaranze kubererekera urukurikirane rw'imodoka ziherekeje Perezida Lungu.

Bwana Hichilema, watsinzwe bigoranye mu matora na Bwana Lungu umwaka ushize, aregwa gushyira mu kaga ubuzima bwa Perezida. Abamwunganira mu mategeko bo ariko bavuga ko ibyo aregwa bishingiye ku mpamvu za politiki.