Mu Bubirigi bamaze umunota wo kwibuka abaguye mu bitero by'i Buruseli.

Abavandimwe Khalid (ibumoso) na Brahim El Bakraoui. Uwufise ububasha kw’isanamu AFP
Image caption Abavandimwe Khalid (ibumoso) na Brahim El Bakraoui.

Ababirigi bamaze umunota umwe bacecetse mu gikorwa cyo kwibuka abantu baguye mu bitero by'iterabwoba byagabwe i Buruseli kuwa kabiri.

Abantu babarirwa mu bihumbi bateraniye mu mujyi wa Buruseli rwagati ahitwa Place de la Bourse ahashyizwe indabyo n'amabuji ndetse n'ubutumwa bunyuranye bwanditse bwamagana iterabwoba.

Ku kicaro cy'umuryango w'Ubumwe bw'Uburayi, umwami Philippe w'Ububurigi na ministri w'intebe Charles Michel bafatanije n'abategetsi bo mu kanama k'Umuryango w'ubumwe bw'Uburayi na ministri w'intebe w'Ubufaransa Manuel Valls mu kwibuka abaguye muri ibyo bitero.

Umukino w'umupira w'amaguru wari uteganijwe kuri uyu mugoroba hagati y'Ububirigi na Portugal ntabwo ukibaye.

Hagati aho ibinyamakuru byo mu Bubirigi byavuze ko inkuru byari byatangaje y'itabwa muri yombi ry' umuntu ukekwaho kugira uruhare rukomeye mu bitero byo kuwa kabiri atariyo.

Uwufise ububasha kw’isanamu Reuters
Image caption Abagabo batatu bakekwa (hano bari ku kibuga cy'indege bafotowe na kamera z'umutekano)

Umutwe wiyita Leta ya Kiyisilamu wavuze ko ariwo wagabye ibyo bitero ku kibuga by'indege n'ahantu abagenzi bafatira gari ya moshi zinyura munsi y'ubutaka.

Ibyo bitero byombi byahitanye abantu barenga 30.

Umunyamakuru wa BBC uri mu Bubirigi aravuga ko inzego zishinzwe umutekano zitekereza ko Najim Laachraoui ariwe wakoze ibyo bisasu.

Yanashakishwaga ku birebana n'ibitero by'iterabwoba byagabwe ku mujyi wa Paris umwaka ushize.

Uwufise ububasha kw’isanamu AFP
Image caption Abavandimwe Khalid (ibumoso) na Brahim El Bakraoui.

Ibitangazamakuru byo mu Bubirigi bivuga kandi ko babiri mu byihebe by'abiyahuzi byagabye ibyo bitero bavukana.

Abo nabo akaba ari Brahim na Khalid El Bakraoui. Abo kandi ngo igipolisi cyari kibazi.